Sîyasetmedarê kurdan Bedreddîn Kavakî va ‘ma seba moral bidî çalakwanan ameyî tîya, labelê çalakwanan moral da ma’ û veng da herkesî ke destê kamî ra çi yeno wa bikero. Herêm Mehmûdî zî dîyar kerd ke bi nê çalakîyan sînorî wedarîyenî û va ‘ganî vengê çar parçeyan bibê yew’.
Çalakîya grevê vêşanîye ke Hemsereka KCD û Parlamentera HDPyî Leyla Guvene 8ê Teşrîna peyêne de seba ke tecrîdê Rayberê Şarê Kurdî Abdullah Ocalanî bêro wedarnayene dabî destpêkerdene, roja 176. de dewam kena.
Çalakîya Nasir Yagizî roja 163. de, ya Îmam Şîş û 14 kesanê Strasbourgî zî roja 137. de ya. Heto bîn ra çalakîya 7 hezar hepsîyan zî dewam kena. Nê hepsîyan ra 15 Hepsîyê ke 4 zîndanan de manenî, 2 rojî verê dest bi rojeyê mergî kerdî.
Sîyasetmedarê kurdan Bedreddîn Kavakî çalakwananê Strasbourgî zîyaret kerd û ewja de qisey kerd. Seke yeno zanayene Kavak zî 24 serrî zîndan de mendo û beşdarê çalakîyanê rojeyê mergî yê 1980î bîyo. Kavak dima ra 2015 de 3 serrî Almanya de zî zîndan de mendo. Kavakî da zanayene ke sere de Leyla Guvene, Nasir Yagiz û xeylê çalakwanî sînorê tehlukeyî derbaz kerdî û cok ra ganî hesasîyet bivirazîyo.
Wa herkes seferber bibo
Kavakî dewamê qiseykerdişê xo de va ‘çalakwanan merhaleyo krîtîk derbaz kerdo’ û bale ant ser rewşa Guvene û Yagizî ser. Kavakî wina va: “Mi wextê zîyaretî de zehmetîyî antî. Çalakwanî wayîrê îradeyêkê pîlî yî. Ma seba ke moral bidî çalakwanan ameyî, labelê çalakwanan moral da ma. Beno ke nê embazan ra tayê ci şehîd bikewî. Labelê ganî ma vernîya mergan bigîrî. Ez veng dana şarî ke wa herkes seferber bibo. Destê kamî ra çi yeno, wa bikero.”
Bi nê çalakîyan sînorî wedarîyenî
Herêm Mehmûd zî Başûrê Kurdîstanî de bajarê Germîyan de grevê vêşanîye de yo û grevê ci roja 68. de dewam keno. Mehmûdî bêvengîya dewlete û rêxistinanê heqanê merdiman rexne kerd û wina va: “Ganî hîna zaf muhîmî bidîyo xoverdayîşî. Vengê ma Germîyan ra resa Amed. Bi nê çalakîyan sînorî wedarîyenî. Yê ke cuyêka bişeref û azade wazenî, ganî bikewî têgêrayîşî mîyan. Çalakîyan de ganî vengê 4 parçeyanê Kurdîstanî bibê yew. Eke ma yewîya xo awan nêkerî, kes ma cîddî nêvîneno. Ez cok ra vera tecrîdî de kewta grevê vêşanîye.”
Mehmûdî bale ant zulmo ke Rayberê Şarê Kurdî Abdullah Ocalanî ser o yeno domnayene ser û wina va: “Ganî ma nê zext û tedayan qebul nêkerî. Tena kesêk eşkeno problemê kurdan çareser bikero, o zî Rayberê Şarê Kurdî Ocalan o. Cok ra seba ke îdeolojîyê Rayber Apoyî asteng bikerî, çi destê înan ra yeno, kenî. Tewr peynî kitabanê ci zî qedexe kerdî. Ganî şarê ma nê raştîyan bivînî û têkoşînêko xurt bidî. Heta ke ez na çalakîye mîyan de ca girewta, mi zaf zehmetîyî dîyî. Ez ameya tehdîtkerdene zî. Labelê mi Leyla Guvene ra hêz girewt.
AMED