Vizêr roniştişo 3. yê doza Hemsereka kehene ya HDPyî Fîgen Yuksekdage ame dîyayîş. Doze Salona Hûmare 1î de ameye dîyayîş. Salone de mabênê Yuksekdage û beşdarvanan de 100 metre mesafe estbî. Kesê ke beşdarê doze bîyî, ge-ge ‘ma to ra hes kenî Fîgene’ qîrayî.
Dozgerî bi mehneya ‘akredîtasyonê înan çin o’ destûr nêda ke heyetê xerîbî beşdarê doze bibî. Avûkatan îtîraz kerd, labelê dozgerî cewab nêda. Serekê Heyetê Mehkeme qerar da ke heyet nêgirîyo zere. Avûkat Ramazan Demîrî pers kerd û va ‘nika salone de Wekîlê Serdozgerîya Komare ya Anqara Aytekîn Cenîklî ronişte yo, gelo sebebê roniştişê ci çi yo? Gelo qerarê şima de tesîrê ci esto?’ Serekê Heyetî zî va ‘şima wazenî herkes beşdarê doze bibo, labelê serdozger nêbo’.
Dima ra Yuksekdage pawitişê xo kerde û wina va: “Ewro merdim Tirkîya de çîyanê başan nêvîneno. Embazê ke waştî beşdarê doze bibî û teber de mendî, rîyê Tirkîya yo raştikên reyde têrî mendî. Destpironêginayîyê ma wedarîyayî. Labelê ewro mehkemekerdişî goreyê qaydeyanê huqûqîyan nînî viraştiş. Huqûq Tirkîya de heta nika qet xoser nêbî, labelê hende zî girêdayeyê tayê cayan zî nêbî.”
Destêk mehkeme ser de esto
Yuksekdage dewamê qiseykerdişê xo de va ‘ez hîs kena ke ser mehkeme de destek esto û nê qeraran de tesîrê ê destî esto’ û wina dewam kerde: “No dest êdî xo nênimineno. Eke welatêk de huqûq nêbo, ewja de rizîyayîş esto. Ez edaletê mehkemeyan nêvana, ez qala edaleto sîyasî kena. Ewro vatişê îqtîdarî mehkeme de tesîr kerdo. Çîyê ke ewro bîyî belayê sereyê ma, do siba bibî belayê sereyê îqtîdarî. Înan 7ê Hezîrane de raştîya HDPyî fam kerdî û cok ra mudaxaleyê ci kerdî. Ewro Tirkîya mîyanê krîzê ekonomîk û sîyasî de ya. Welat bi OHALî yeno îdarekerdiş. Hakimî ewro kesê ke Amerîka de yenî mehkemekerdiş, tîya de mehkeme nêkerdbî. Ma serran ra ver vatbî ‘çira şima nê merdiman mehkeme nêkenî?’ Labelê aseno ke ewro ameyo famkerdiş ke ma çiqas raşt vato.”
MA /ANQARA