Mihrîcana Rojava ya duyemîn a filmên sînema, li navenda Çand û Huner a Mihemed Şêxo ya li bajarê Qamişlo, hate destpêkirin.
Bi serperiştiya Komuna Film û bi kordîneya Tevgera Çand û Hunerê Demokratîk a Cizîrê, Mihrîcana Rojava ya Duyemîn a Filmên Sînema, bi boneya salvegera şewata sînemeya Amûdê, dest pê kir.
Di roja yekemîn a mîhrecanê de, bi dehan şêniyên bajarê Qamişlo, nûnerên Rêveberiya Xweseriya Demokratîk, TEV-DEM, partiyên siyasî û şervanên YPG`ê yên birîndar, amade bûn.
Mihrîcanê bi rêzgirtinê dest pê kir. Paşê, pêşkeşvana mihrîcanê bi Kurdî, Erebî û Înglîzî, bixêrhatina beşdaran kir.
Paşê, Hevseroka Desteya Rêveber a TEV-DEM`ê Asya Abdullah axivî û Komkujiya Sînemeya Amûdê bi bîr anî û sersaxî ji malbatên erdheja Başûr û Rojhilatê Kurdistanê re, xwest.
Hevseroka Desteya Çand û Huner a Cizîrê, Bêrîvan Xalid jî got, ev mihrîcan destpêka bipêşketina sînemayê li Rojavayê Kurdistanê ye.
Piştî axaftinan, navên filmên ku wê werin pêşandin û derhênerên wan, hatin xwendin.
Li gorî komîteya amadekar, pêşandana filman wê heta 17`ê Mijdarê dewam bike û 77 belgefilim û kurtefilm, wê werin pêşandan. Pêşandana filman îro jî li bajarên Serêkaniyê, Dêrik û Hesekê, dest pê dike.
ANHA / QAMIŞLO