Roja verêne ya Vîrusê Korona ra nata Tirkîye de bala her kesî şîye hepisxaneyan ser. Îqtîdarê AKP-MHPî qanûnêkê 70 maddeyan amade kerd. Rixmê vengdayîşanê muxalefetî zî hepsê sîyasîyî û rojnamegerî tewrê nê qanûnî nêkerdî. hepsê hepisxaneyê Mintiqaya Marmarayî pê rayîrê keyeyanê xo qala meseleyanê hepisxaneyan kerdê. Hepsîyan derheqê rewşe de nê zanayîşî dayî: * Hepisxaneyê Edîrneyî de Cevher Ay nêweşê Koahî û qelbî yo. Ay wedarîya nêweşxane labelê nêame dermankerdene û pê dejê xo erşawîya Hepisxaneyî. * Hepisxaneyê Boluyî de odayî bi hawayêkê holî nênê dezenfektekerdene. Sabun û deterjanî ra berî malzemeyê pakîye nêdîyenê. Deterjan zî şuşeyê awe yan zî çayî de yeno dayiş. * Hepisxaneyê Akhîsarî de Ridvan Çelîk pê rayîrê telefonî pare kerd ke wextê peyênî de hînî ê nêeşkenê kantînî ra zî çîyêk bihêrînê. Her çi zaf vay o. * Hepisxaneyê Gebzeyî de 3ê adare ra nata gardîyanî heqaretê hepsîyan kenê. Şadîye Menav, Hacere Halîl Yusuf û Rojbîne Perîşan rê cezaya hucreyî ameye dayene. * Hepisxaneyê Sîlîvrîyî de Kemal Ekîncî nêweşê qelbî yo. Ekîncî koxuşêkê bêhewayî de yeno tepiştene. Hepsî bi asanî nêeşkenê şorê revîr. Hepsê nêweşî nêerşawîyenê revîr. Hepsî vanê karantîna bêdermanî ra zehmetêr a. Zafer Saglam û Hamza Polat ê ke Hepisxaneyê Sîlîvrî de yê, nika binê karantîna de yê. STENBOL