Rixmê fermanê qedexekerdişî, Rojbîyayîşa 68. yê Rayverê Şarê Kurd Abdullah Ocalan’î, dewa ke ame dinya Amara de bimbarek bî. Merasîma bimbarekînî de serbestîya Ocalan’î wazîya.
Wezîrê Karê Zerrî çarçoweyê OHAL’î de Riha û qezayanê ci de pêrokîn meş, damûstayîn û çalakîyan qedexe. La Kurdistanijê ke OHAL’î nêsilasnay, Rojbîyayîşa 68. yê Ocalan’î, dewa Amara de bimbarek kerd.
Lejker û polîsan bi wesayîtanê zirxî û TOMA’yan dormeyê dew girotî. Kesê ke ravêrdî dew zî cigeyrayîşê polîsan ra ravêrîyay. Merasîma bimbarekînî bi tewrbîyayîşê malbata Ocalan’î, Hemseroka KCD Leyla Guven, Parlamenterê HDP, Dîlek Ocalan, Mahmût Togrûl, Behçet Yildirim, Endamê Meclîsê Dayikanê Haştî, endamanê TJA, endam û rayveberanê HDP û DBP de, ver keyeyê Ocalanî de virazîya. Bimbarekkerdişî de sloganê “Bicuwe Serok Apo”, “Rojbîyayîşê to bimbarek bo ey Serok” amey berzkerdiş. Vindertişê hurmetî ra dima birayê Ocalan’î Mehmet Ocalan’î xêyrameyîşê meymanan kerd.
‘Wa tecrîd wedarîyo’
Bira Mehmet Ocalan’î vist vîrî ke rojbîyayîşê Ocalanî, rojbîyayîşa pêrokîn kurdan a û aşkere kerd ke emserr tehamul nêkerdî ke bimbarekîn virazîyo û qedexe kerdî. Ocalan’î dîyar kerd ke înan waşt goreyê şana rojê Rojbîyayîş bimbarek bikerê, la destûr nêame dayen, pêrokîn şar nika dorpêça lejkeran de yo. Mehmet Ocalan’î waşt ke tecrîd desinde bîro wedarnayîş û pêdîyayîşî newe ra destpa bikerê. Hemseroka KCD Leyla Guven’î zî ard ziwan ke rixmê pêrokîn zext û manîkerdişan, ê Rojbîyayîşa Ocalan’ê bimbarek kenê. Guven’î şaro ke rixmê zext û manîkerdişan şi Amara rê berxudarîya xo ard ziwan û va, Rojbîyayîşê Ocalanî, rojbîyayîşa şarê kurd o.
‘Ma amey Amara’
Guven hayr ant ser tewrê Wezîrê Karê Zerrî Suleyman Soylu yê "Do kes nêşo Amara" ser û wina va: “ Bi fermanê Wezîr Soylu û OHAL’î her çî ame qedexekerdiş. Rixmê OHAL û qedexeyan reyna zî ma tîya de yê. Ma amey Amara. Na têkoşînî xêlê wezîrê dewlet yê zey Suleyman Soylu dî. Ewro pêrokînî rîpelanê tarîxî de vinî bî, şî. La Brêz Ocalan û Têkoşîna Serbestîye Kurdistan hona zî estê. Mehmet Tunç, Sêvê Demîr û embazanê înan têkoşîn kerdî û weşîya xo kerdî vinî. Dima ra, şarî rixmê pêrokîn hêrîşan Newroz bimbarek kerdî û cewab day hêrîşkaran. Rixmê OHAL û hêrîşan, ma ewro reyna tîya de yê.” Damûstayîn bi sloganê “Bicuwe Serok Apo” qedîya.
Damûstayîn ra dima, Hemseroka KCD Leyla Guven wextê vetişê dew ra amê binçim girewten. Herzewbîn cendirmeyan zî eştî keyeyê Ocalanî ser, zerre û çormeyê dew de cigerayîşan viraştî.
DÎHABER/RIHA