Kantona Cizîr de nezdiyê sûka Dirbesiyê de cenîyan bi munasebeta 25ê Mijdarî gameke tarîxî eşt û destpa ronayişê dewa cenîyan kerd. Dewa cenîyan 'Jinwar' projeyekê Kongreya Star o û hetê rêxistinanê Jîneolojî, Weqfa Jina Azad wertex yeno ramiten. Seba ronayişê 'Jinwar' cenî dewe de are bî û bi coşeke gird pê selamî kerdî û dima ra beyanateke ame dayen.
Endama Navendê Jîneolojî Rûmet Heval beyanatî de vist vîrî ke ê 56. Serragêra qetilkerdişê Wayanê Mîrabel de şîdeta ke bi hezaran serrîyo dûştê cenîyan de bena protesto kenê. Heval aşkere kerd ke îdeolojîya cinsîyetperwer ya camêrdan, bi zihnîyetê kiştişê cenî xo perwerde kena û kena pîl. Rûmet Heval vist vîrî ke vera şîdetî de xorêxistinkerdiş û gureyê bi eşq hewce keno.
Zeman û mekanê cenîyan
Heval hayr ant projeyê dewa cenîyan ser û wina va: "Dewa cenîyan bingeyê hemleya newî ya. 25ê Mijdara emserr de seba cenîye ke hemverê şîdetî de tekoşîn kenê, ma Qadanê Ciwîyayişa Azad yê cenîyan ronenê. Cewabê tewr erja zî no yo. Ciwîyayiş do reyna dormeyê cenî de bîro ronayen. No xeyal û utopya nîyo." Rûmet Heval dîyar kerd ke ê îlanê zeman û mekanê cenîyan kenê û xebatê ronayişê dewa Jinwar danê destpa kerdiş.
Dima ra endama RAJIN-Rojava Binevş Sarya hîsanê xo pare kerd û vist vîrî ke bi serrano projeyê ronayişê Sûka Star estbi û nika zî hemleya yewî destpa kena. Sarya vist vîrî ke yew cayo ke cenî bibo de ciwîyayiş yeno afirnayen û va, ma wazenê bin sersîya nê leye ke ma ronay de bi Rayver Apo ra bîrê pêhet.
'Xeyalê Rayver Apo bi'
Cenîya Ereb ya qezaya Zirgan yê Dirbesiyê ra ya Însaf Ebdullah Silêman zî aşkere kerd ke cenîye ke na dewî de weşî bikerê dê bê yardimê camêrdan cuyê newî ronê. Silêman vist vîrî ke zewbîn zî pirojeyê înan yê cîya estê û wina va: "Ma bi felsefeyê Rayver Apo ray şinê. Felsefeyê eyî seba serbestîya cenîyan a."
Endama komîteya ronayişê dewa 'Jinwar' Arya Mistefa zî dîyar kerd ke bi hezaran serrîyo ke vera cenîyan şîdet beno û va, 'Xeyalê Rayver Apo ronayişê dewa cenîye azad bî. Ma zî destpa gureyê ronayişê dewa 'Jinwar' kerd.
Sifte 30 keyeyî virazîyenê
Endama komîteya ronayişê dewa 'Jinwar' Dîmen Evîn zî bi nê vatenan behsê dewe kerd: "Ma sernî de fikir kenê ke 30 keyeyan virazê. Herzewbîn sazgehê zey dibistan, cayê çand û kulturî ûsb. virazê. Dima ra beno ke hûmara keyeyan vêşêr bo. Do her çîye dewî tebiî bo. Ma dê giranî bidê perwerdeyê cenî û domanan yê dewe. Waştena ma naya ke cenî demdergî no ca de biciwîye."
Dîmen aşkere kerd ke iyê dê aşma Sibatî de destpa viraştişê keyeyan bikerê û ard ziwan ke ê wazenê ke heta peynîya aşme no projeyî beqedîne.
JINHA / DIRBESIYÊ