SEMRA TURAN MA/DÊRSIM Bi ameyîşê payîzî pelê daran dest bi weşîyayîşî kerdî û êdî tebîet de renginîye virazîyena. Nê cayan ra yewe zî dewa Salorikî ya qezaya Pîlemûrîye ya Dêrsimî ya. Dewa Salorikî bi renginîya xo kesê ke yenî zîyaret kenî, xo rê heyran verdana. Orteyê aşma teşrîna verêne ra heta orteyê aşma teşrîna peyêne fotografkêş û tebîethezî na dewe zîyaret kenî. Bi nameyê Nîmet Alanî de keso ke reya sifteyîne yeno tîya, va ‘ez zaf reyan beşdarê gêrayîşê teberê welatî zî bîya’ û wina domna: “Her herême goreyê xo rindîyê ci estî. Renginîya na dewe û tebîetê ci merdimî şaş keno. Verê cû mi fotografan de dîbi, labelê bade ke mi bi hawayo ganî dî, ez hîna zaf heyran bîya.” Tebîethez Haydar Çetînkaya zî va ‘herêma Salorî cayêko zaf weş o’ û wina dewam kerd: “Tena bi nebatan nê, bi heywananê kovîyan zî tîya zaf dewlemend o. Ganî tebîetê Dêrsimî bêro pawitene û neqlê ameyoxî bêro kerdene.”