Nizdîyê 3 aşmî yo ke Dêrsim de û çend bajaranê bînan yê Kurdistanî de daristanî veşenî. Zafaneyê şewatan netîceyê operasyonanê leşkerî û bi hawayo qestî veşnayîşê leşkeran de vejîyenî.
Bitaybetî Dêrsim de herêma Deşkî ya Qisle, Geyîksuyu, Sîn, Halvorî, Mezrabalî, Şixmeran, Dere Are û Newala Balî de şewatî dewam kenî. Şewatan ver bi hezaran darî veşayî û bîyî wele.
Babete ser o dewij û aktîvîstan qisey kerdî û derheqê şewatan de melumatê muhîmî pare kerdî.
700 hektar daristan veşa
Aktîvîst û dewijan dîyar kerd ke Tirkîya de verê cû şewatêko winasî qet nêbîyo û tena aşma temmuze de 550 hektar hêgayî veşayî û wina dewam kerd: “Her ke şono na hûmare nizdîyê 700 hektarî beno. Goreyê fotografê ke cayê hedîseyî de ameyî antiş sey ke Walîtîya Dêrsimî vano tena vaşî nê, darî veşenî. Ma mirênenî, ê veşnenî. Nîyetê înan o yo ke bi temamî koyanê Dêrsimî biveşnî û newalan zî bi awe pirr bikerî. Wa înan ra hesab bêro perskerdiş.”
Heto bîn ra kesê ke beşdarê îzehetê çapemenîye vera şewatan de amebî viraştiş bîyî rê 227 lîra cezaya pereyî ameyo dayîş.
MELÎKE AYDIN / DÊRSIM