Dewlet qet nêbedilya

Licêya Amedî de operasyonê qedexe û çinkerdişî domyenî, nika çeteyê dewlete zey serrê 90’î wazenî Licê çin û wêran bikerî. Serrê 90’î de çeteyê dewlete senî Licê talan û wêran kerdî ser qise kerdî.Şahîda serra 93’î Nadîre Bozkuş (70) vat ke serrê 90’î ra hîna berz zilmê dewlete zêde bîyo û wina vat: “Lejkerî ke serrê 90’î de ameyî dewanê ma dek kerdî, ma ra vatî ke; eke şima dewanê xo terk nêkerî ma do şima biveşînî. Ma dijî heme nê teda û zilmê dewlete dewanê xo terk nêkerdî. Ma serrê 90’î de seba ke dewanê xo terk nêkerdî, her ca veşnayî. Her kesî kom kerdî bi mergî gef werdî, peynî zî dewanê ma veşnayî û ma ra vatî ke bivajî terorîstî dewanê ma veşnayî.”

Hona wazenê biveşnî

Nadîre Bozkuş aşkera kerd ke serrê 90’î ra nika kurdan ser o polîtîkayê mêtingerî yenî şuxilnayîş, nika şarê kurdî ser o teda û zilmî her ke şono zêdîyenî. Nadîr Bozkuş ciresna ke çi heyf ke nika Licê binê dorpêçê çeteyê dewlete de yo, binê nameyê ‘dijî terorî têkoşînî’ de wazenî dewan biveşnî.

Dewlet bi xo ramitena 

Nadîre Bozkuş qedexe ra bertek nîşan da û aşkera kerd ke binê nameyê esrarî operasyon virazenî la her kes zaneno ke dewlet bi xo esrarî ramitena. Nadîre Bozkuş îzeh kerd ke armancê nê operasyonanan qirkerdişê şarê kurdî yo, ê bi zanî ke kurd qet peynî nêbenî û kurdî bi hezaran reyde herikyenî qadê xoverdayîşî. Şahîda serrê 90’î Husnu Sevînça ke serra 1993’î de dewlete mêrdeyê ci qetil kerdbî û zilmî de dîbî yew bi yew vat: “Demo ke lejkerî ameyî dewanê ma biveşnî, no demî ez bi lajê xo rez de xebityaynî. Lajê min vat ke dayê biewnî Licê ra duman vejîyena. Min demo ke sereyê xo hawana no demî min dî ke pêroyî Licê ra duman vejîyena. Bi lezî ez remaya banê xo la heme dewijan kom kerdbî û peynî zî berdbî. Dijî zilmê dewlete lajê min vejîya koyî.”

Husnu Sevînç ciresna ke demo ke lajê ci vejîyayo koy, a lajê xo tembîh kerda ke Licê terk nêkero û wina peynî kerd: “Erdogan do gonî ke herikneno, do na gonî de bixeniqo. Bi veşnayîşê dew û goristanê ma Erdogan peynîya xo, xo bi xo hadre keno. Rayîr de 10 ray ma gêrenî, no zî nîşan dano ke tersenî. Ma bikişî zî ma herra xo terk nêkenî.