Mektebê Seretayî yê Ferzad Kemanger ke çarçoveyê ‘Mektebê Statuyê Taybet’ de 2014î de abîya, verîya çend rojan kêberê ci ame morkerdiş. Dûştê nayî nêrazîbîyenî ramenê.
Maya domanan (qijan) ra Gurbet Akin na nêheqiyê rê hêrsê xo ard zûne û va, ê destûr nêdanê ke zûn û kulturê domananê înan vinî bo. Akin dazûnayene ke ê nê miyerî nêsarisnenî û zûne xo de perwerde vînene. Welatijan ra Emîne Oztekîn zî vera morkerdişê mektebî vecîya û va: “Eke dewlet mektebanê ma kena mor se, ma zî keyeyanê xo çarnenê mekteban. Oztekîn arde zûne ke ê semedê zûn û kamîya xo, moran şiknenê.
Kobanê de DAIŞ îta de dewlet
Ayşan Kanûş zî ana zûne ke dewlet zûne înan ra tersena, coka kena qedexe. Kanûş va, ‘waştişê dewlet no yo ke, bi temamî werte ra wedarnayişê kurdî yo, la destûr nêdanî ci. Rolata Ahmed ke Kobanî ra rîwalê êrişanê DAIŞ ra remaya û şîya Amed zî arde zûne ke 3 qijê ayê şînî no mektebî û ê qe tirkî nêzanî. Ahmed va, ‘Kobanê de DAIŞ û îta de zî dewlet ma rê herîş kena. Waxto ke mekteb girotîya qijê mi zaf bermayî. Dewlet zûnê kurdan ra çi wazena?
‘Zonê xo ra zaf hes kena ‘
Wendekara bi nameyê Werde Abdîye ke pola 3. de ders vînena zî aşkere kerd ke a wazena ke bi zonê maya xo de perwerde bivîno û va, ‘ez zonê xo ra zaf hes kena. Nêwazena şira mektebanê tirkî.’ Rosîda Usttekîn ke pola 2. de perwerde vînena zî vist vîrî ke mektebê înan ke ame girotiş, mektebê sifteyin yê bi kurdî yo. Usttekîn aşkere kerd ke ê rîwalê girotişê mektebî zaf qehrîya yê û va, ‘wazenê ma asîmîle bikerê. Ma dê moro ke vistî kêberê mektebê ma ser wedarnê.’
‘Zonê xo ra fek nêverdana’
Ronya Metîn a 8 serrî zî ana ziwan ke a mektebê xo ra zaf hes kena û wina vana: “Ez wazena ke mektebê ma abîyo. Ez wazena bi ziwandê xo de perwerde bivîna.” Hîldan Îsmaîl ke Kobanê ra şîya Amed û pola 3. de perwerde vînena zî bi nê vatişan hêrs û hîsanê xo ard ser zon: “Ganî mektebê ma nêgirotîyayba. Mektebê ma bigîrê zî ez do ziwandê xo ra fek veranêda.”
DÎHA / AMED