Şaristanêy Kurdistanî de dijî polîtîkayê şerî yê AKP de şar xorayîrberdiş û xopawitişî îlan kerd û şarê kurd xorayîrberdiş û xopawitiş xo rê esas girewto û hemserekêy DBPe zî na îradeya şarî ra zî rêz mojnay. La nika dewleta AKP zî xo ra sey hedef hemserekê HDPe girewta. Çarçiweya no konseptî zî polîsê AKPe hemserekê Sûrî Fatma Şik Barut, Seyîd Narîn û hemsereka Farqînî Yuksel Bodakçi îşkenceyî reyde girewtî binçimî. Çapemenîyê AKPe zî îlankerdişê xorayîrberdişî zey argumanê şerî şuxulneno û şarê Tirkîyaye ra zî şaş pêşkeş keno. Raştîya Xorayîrberdişî çiyo? Ser hemsereka DBPe Emîne Ayna qise kerd.
Bireya demokratîk
Hemsereka HDPe Emîne Ayna vat ke xorayîrberdiş de kes û ya zî şar cayeke de cuyena, heqê na caye de bire xo, xo bi xo dano û no ser zî xorayîrberdiş lazim o weş bêro famkerdiş.Ayna wina vat: “Şar bireya xorayîrberdişî ona rehet nêda, çimkî bireya şarî de rolê konseptê şerî esto. Taybetê bireya şarî de polîtîkayê Erdogan zî estî. Hetanê nika şar ona dîyarkerdişê dîrok de bireya xorayîrberdişî nêgirewtbi. Demo vîyarte de Kongreya Komeleya Kurdistan (DTK) bireya xorayîrberdişî girewtbî, la bireya şarî de rolê vatişê Erdoganî estî. Yê, xoserî çin a la şar silgerîya HDPe reyde bire day ke sîyaset bikero la na manaya xorayîrberdişî nîno.”
Ayna ciresna ke şaranê Tirkîyaye weçînayişê 7’ê hezîranî de sîyasetmendaran ra mesaj dayî û wina domna: “Şaranê Tirkîyaye sîyasetmedaran ra mesaj dayî û vatî ke wa problemê kurd bêro çareserkerdiş, çareserîya problemê kurd de rolê îradeya sîyasîyî zaf bi muhîm o, no ser zî şar vat; ma HDPe Meclîsî ra eşrewenî û AKPe ra zî vat ke ma wazenî ti problemê kurd çareser bikerî. Çi heyf ke peynîya weçînayişî de serekkomar Erdogan îradeya şarî nêşinasna. Dijî na bireya Erdoganî zî şar dest pê îlankerdişê xorayîrberdişan kerd. Nika Tirkîya de rewşê şerî esto, êdî malbatê persenî ‘qey domanê min mireno?’ Û no ser zî rewşê nikayin de verpirsîyar Erdogan o.”
Dewleta şarî çin a
Ayna aşkera kerd ke şar dewlete nê, dewleta AKPe şarî nêşinasnena û wina peynî kerd: “Qet aşkerayan de şar nêvatî; ma dewlete nêşinasnenî, peynîya weçînayişî dewleta AKP şarî nêşinasna. Mîyanê kaosî ra Tirkîya encax azadbîyîşê Rayverê Şarê Kurd Abdullah Ocalan reyde bivejîyo. Eke kaos verdewam bikero do şar însîyatîf bigêro û xorayîrberdişî ra zî israr bikero.”