Komîteya Caardişî ya Kampanyaya ‘Cinîyî Rojawan Pawenê’ îzehetêk da û bale ante serê plan û dagîrkerîya dewleta Tirkî ya Vakur û Rojhelatê Sûrîye ser.
Komîte îzehetê xo de vato ‘peymana ke mabênê Tirkîya û Amerîka de ya, yena manaya qirkerdişo etnîk ê Vakur û Rojhetlatê Sûrîye’ û wina dewam kerdo: “Nimuneyê nêyî zî hêrişê qirkerdişî û sucê şerî yê dewleta Tirkîya yê. Bi taybetî herêma mabênê Til Temir û Kobanê de bombardûman, dormegirewtiş û talanî ameyî kerdene.”
Komîte dewamê îzehetê xo de dayo zanayene ke 200 sivîlî ameyî qetilkerdene, bi seyan sivîlî birîndar bîyî û wina vato: “Bi hezaran merdimî neçar mendî ke koç bikerê. Dimayê taqîbkerdişî ameyo dîyayene ke dewleta Tirkî hêrişan de sîlehê kîmyewî bikar ardo. La reyna zî dagîrkeran nêşêna xoverdayîşê cinîyan û Rojawanî bişiknê.”
Îzehet de ameyo vatene ke hetê Amerîka û Tirkîya ra qerarê adirbirnayîşî ameyo girewtene û wina domîyayo: “Qet goreyê adirbirnayîşî hereket nêkerd. Aşkere yo ke dewleta Tirkî û çeteyê aye seba ke qirkerdiş û şeranê neweyan bikerê, amadekarîya newîye kenê. Heta ke ma nê qirkerdişan û plananê dagîrkerîye wedarnê, ma do çalakîyanê xo bidomnî. Bi taybetî seba ke tayê rewşî bêrê caardene, ma do Konseyê Asayîşî yê Milletê Yewbîyayeyî, pêroyê hukmatan, pêroyê dezgehanê wezîfedaran ser o tedaye bikerê. Ganî seba pawitişê şaranê Vakur û Rojhelatê Sûrîye gama tewr verêne û lezabeze bêra eştene na ya ke qedexekerdişê firayîşê teyarayan a. Ganî bi hawayo lez dewleta Tirkî dagîrkerîya xo bivindarno.”
BRUKSEL