Badê îlankerdişê Xoserîye qedexeyo ke 6 taxanê Nisêbînî de dewam kerdêne, bi temamî ame wedarnayîş. Badê ke qedexe ame wedarnayîş, na rey zî şar sewbîna polîtîkayêka talanî reyde têrî mend.
Her çiqas ke qeza de qerarê îstîmlaqî çin o, reyna zî bê xebera taxijan rijnayîş dest pêkerdo. Badê taxe ame serûbinkerdiş, nika zî viraştişê înşaatê TOKÎ dewam keno. Kesê ke bêxebera înan keyeyê înan ameyî rijnayîş û ser milkê înan de înşaatê TOKÎ virazîyenî, vera na rewşe de hêrsin î.
Nê kesan ra yewe zî Leyla Şamane ya. Babete ser o Leyla Şamane qisey kerde.
Seba tapuyan kaxirto veng
Şamane va ‘ti nisêbînij keyeyanê TOKÎye de nêmaneno’ û qiseykerdişê xo wina domnaye: “Heta nika çi heqê kîra û çi zî heqê eşyayan nêdîyayo ma. Dewlete bê xebera ma ersayanê ma ser de înşaatê TOKÎ virazena. Badê ke pêrodayîşî qedîyayî, Wezîrîya Bajarvanî û Dormeyî veng daye ma. O wext ma ra waşt ke ma kaxito veng îmze bikerî. Hetta ma ra vatî ke ‘vera îmzeyê şima de ma do 12.5 hezar TL pere bidî şima û keyeyê ke yenî viraştiş ra zî ma do daîreyêk bidî şima. Hîna temînatêk nêdîyabî ma, hewl dayî tapuyanê ma, ma ra bigîrî. Her çiqas ke keyeyê min o 3 qatin nîmeyê ci xirab bîyo, reyna zî mi îmze nêkerd.”
Dewlete zulm bi ma kena
Şamane dewamê qiseykerdişê xo de va ‘keyeyê ma 3 qatin bî û dewlete seba ke barîqatî virazîyayî, bi desan keyeyan xira kerde’ û wina dewam kerde: “Mîyanê nê keyeyan de keyeyê ke qet xisar nêdîbî zî estbîy. Dewlete zî nînan baş zanayêne. Merdimî bombeyan ra tersayêne, labelê reyna zî waştênê ke keyeyê xo bivînî. No proses de çend merdimî teqayîşê bombeyan ver merdî.”
Hîna zî cenazeyî yenî vetiş
Şamane peynîya qiseykerdişê xo de va ‘xeylê nisêbinijan îmze nêeştî nê kaxitanê vengan’ û wina qedênaye: “Çimkî cayê ke înşaatê TOKÎ yenî viraştiş de hema zî cenazeyî yenî vetiş. Wazenî ser este û gonîye de cuyêka newe awan bikerî. Ti kes nêşêno nê daîreyan de bicuyo. Keyeyê ke tîya de yî heme zî keyeyê hîra yî û heme zî tapuyê înan estî. Dewlete hewl dana nê keyeyan ser ra zulmê ma bikera. Ma ra vatî ‘îmze bierzênê ma do bidî şima’ labelê nika aqûbetê nê keyeyan dîyar nîyo. Na polîtîkayêka koçkerdişî ya. Mi wextê pêrodayîşan de daxî keyeyê xo nêterikna. TOKÎ zulmê dewlete yî.”
MÊRDÎN - ŞÛJIN