Seke yeno zanayîş 3 rojî verê dewa Talê ya Colemêrgî de wesayîto bêmerdim yê sîlehin (SÎHA) bombe eştbî dewijan ser de û kesêk merdbî û 3 kesî zî birîndar bîybî. Hedîse ra rojêkî dima sewbîna cayêkê pêrodayîşî ra 2 cenazeyî ardî nêweşxane û sey ke nê cenazeyî aye dewe de merdî nîşan dayî.
Babete ser o Parlamenterê HDPyî yê Wanî Lezgîn Botanî qisey kerd. Botanî va ‘wexto ke ma dewijan reyde pêvînayîş kerd, dewijan ma ra va bêxera ê 4 kesan sewbîna ti kes dewe de nêameyo kiştiş’ û wina dewam kerd: “Înan her di cenazeyê gerîlayan ke morg de yî, sewbîna cayî ra ardî û na xebere hetê dewijan ra dîyaye ma. Çimkî Walîtîye seba ke serê hedîseyî bigîro, îzehetê ‘4 PKKyî ameyî kiştiş’ kerdbî û dima ra Walîtîye 3 reyan na xebere bedilnaye.”
Botanî dewamê qiseykerdişê xo de va ‘nê 4 kesê ke raştê hêrişî ameyî, xora kontrolê polîsan ra derbaz bîybî, eke sey ke Walîtîye vana nê kesî hemkar bî, çira nêameyî tepiştiş’ û wina domna: “No vatişê ‘hemkar’êdî mehneya newe ya qetilkerdişan o. Wexto ke keyeyê ke raştê hêrişê polîsan yenî, wazenî gerre bikerî, raştê tehdîdê polîsan yenî. Labelê reyna zî dewijî gerre kenî, la dozger waştişnameyê înan qebul nêkeno. Ti rejîm de çîyêko winasî çin o. Hedîse ra dima muxtarêkî mi ra va ‘ez şîya qereqol û mi va; çira şima dayo sîvîlan ro? Leşkeran zî va; ma do sewbîna ca ra 2 cenazeyan bîyarî’. Bi hawayo aşkere aseno ke 2 cenazeyan seba ke serê qetlîyamî bigîrî sewbîna cayî ra ardî.”
Sîlehan kurdan ser de ceribnenî
Botanî qala definkerdişê Temelî zî kerd û wina va: “Cenaze nêşiwîyayêne, tabut nêameyêne dayîş. Camî yeno padayîş û ambulanse nêdîyena. Seba ke keye cenazeya xo defin bikero, îmkan nêdîyeno keyeyî. Çimkî dewlete tayê çîyan niminena. Doktoran tehdît kenî, melayî tehdît kenî. No faşîzm o. Sîlehê ke îcat kerdî kurdan ser de ceribnenî. Wazenî bi nê qetilkerdişan şarî teslîm bigîrî.”
ANF/COLEMÊRG