Nusteya ewro de ez wazena behsê deyîrbazê Çewlîg Rênçber Ezîz bikera. Bîyayîş, cuyayiş û merdişê Rênçber Ezîzî senî bîyo? Deyîrê êy senîn ê?
Rênçber Ezîz serre 1955 de dewa bajarê Çewlîg Wusfanî de dadîya xo ra beno. 1956 de wexto ke yew serre bi, yew nêweşîye gird vîyarnêno û nêweşî ra dima çîmanê xo keno vînî. Nêweşî ra pey keyeye xo bar kenî û yenî Çewlîg. Ezîz serranê xo ya qicikeyî pey (bi) hetkarîye birayanê xo viyerneno. Goreya vateyî Rênçber Ezîz qicikê xo ra deyîrê Çewlîgijan vatêne. Reyna goreyê vateyan Rênçber Ezîz bi koriya xo serre 13 de pey teneke, xo ra yew plaq virastibî. Ciwîyayişê Rênçber Ezîzî mûzik ser o bî û her ca de deyîrê xo vatênî. Labelê keyeye Rênçber Ezîzî qayil bi ke wa êy bibo hefiz. Hem venge êy weş bi, hem zî aqilê êy zaf hera bî. Na ridî ra serre 1968 Rênçber Ezîz erşawenî medrese. Rênçber Ezîz dest pê perwerdeyî medrese keno. Rênçber tay yew mûde de perwerdeyî yê xo zaf hol vîyarneno û beno hafizê kûr'an.
Çend serre ra pey Çewlîg de yew erdlerza pîl beno û xeylek merdimî no zelzele de mirenê. Rênçber Ezîz zî no zelzele de dadîya xo keno vînî. Çi heyf ke emrê xo de dadîya xo nêvîne bi, dadîya Rênçber Ezîzî her wext paşte êy da bî. Lajê xo ra zaf heskerdenî. Badê merge dadîya xo, nêeşko Çewlîg de vindero. Badê yew ser vernîye xo da Stenbol û perwerderîye xo tiya de dewam kerd. Hevêr şi mekteba mewlidxane de wend. Nê serran de hem şiyenî mekteb hem zî cemîyetê dewîjan de alfabeyê koran museybî. Saya nê alfabe zî hem wendiş hem zî nuştişê êy zaf hol bî. La zerreye êy de tim û tim muzîk est bî. Qicektîyê xo ra zî wayîrê qabîlîyetî muzîkê bî. No saye de cenayîşê sazî musa. Cemîyeta koran de zaf cayanê Stenbolî de programan de vejîya û qabîlîyetê xo asan kerd. Rênçber Ezîzî serre 1977 de destpê besteyanê xo kerd û deyîrê xo nuştî. Zafîyer, deyîrê xo de behsê welatperwerî û kurdatî kerd. Pey deyîrê xo zî mesajê komelkî dayî. Deyîrê xo hem bi kurdî hem zi bi tirkî vatêne. Rênçber Ezîz qayil bi ke heme komel wa hîşyar bibo û wa xo bizano. Xebatê muzikê kurdî yê Rênçberî şino goşanê sermîyananê dewlete û dewlet Rênçberî tepişena û erzena hepisxane. Rênçber Ezîz semedê dêyîrê xo yê kurdî beno sucdarê propagandaya sîyasî. Nêzdîye hewt aşme hepîsxane de maneno, bade serbest veradayîşî agêreno şino welatê xo. Çewlîgî de çend aşme vindeno, la dewleta zordar Ezîzî rehet nêverdana; Na rîdi ra zî Rênçber serre 1978 de Çewlîg ra vejîyeno û şino welatê xerîbîye. Çend roje ra pey reseno Elmanya. Tîya de heqê îltîcayê sîyasî gêno û cuwîyayişê xo Elmanya de dewam keno. Rênçber Ezîz tîya de xebatanê muzikê Kurdî ser de xebitîyeno.
Albumê xo yê yewin bi nameyê ‘Hesreta Azadî’ vejeno. Rênçber Ezîz zerre ra pêsteyî zazakî bî. Welatperwerekê gird bî û nasnameyê xo rind zana. Na ridî ra zî deyîranê sîyasî viraştêne û vatêne. Labêle deyîranê Rênçber Ezîzî welatî de qedexe bi. Rênçber qasetê xo bi destê xo pey teyîban de kerdenê zaf û erşawitene şarê xo yê Çewlîg. Waharê deyîrê “Bîngol Şewitî“ zî Rênçber Ezîz o. Rênçber Ezîz na deyîra xo ser gerîlayê Cewlîg ra qisîyayişê embaz Zekî virazeno û vano. Yeno zanayîş ke embaz Zekî verê banê xo de hetê dewletî ra yeno kiştiş.
Deyîra “Bîngol Şewitî“ de Rênçber Ezîz wina vano:
“Bingol şewitî mîj û dûmane
megrî megrî dayê megrî
esker ketin nav gûndane
Bingol xerab em têdane
Zekî kuştin ber malane
megrî megrî dayê megrî.“
Rênçber Ezîzî deyîrê xo ser welatperwerî, hesret, eşq û hişmendî vatêne. Her yew deyîrê xo de şarê xo rê rayverîye kerdêne. Kes şeno vajo ke mesajê êy resayî şarê kurdî.
Labelê çi heyf ke Rênçber Ezîz serre 1988 de dinyayê xo bedilna. Goreyê vatişan Rênçber Ezîz yew banê berz ra gineno erde û mireno. La, heme merdimanê êy bawer kenî ke Rênçber Ezîz bi sebebê nasnamayê xo amebî kiştiş. Heta ewro zî merdişê Rênçber Ezîzî de gûman esto. Rênçber Ezîz peyê xo de deyîrê bi ziwanê xo verda. Mezelê Rênçber Ezîzî dewa ci Wusfanî de yo. Kerraye (sî) mezele êy ser o de, ser waştişê wesîyete êy wîna nusîya yo; “Eyy reywan vinde! Hîris û di serre mi roşnîye nêdî. Rumetê roşnîye bizanî. "