Bade ke merge şîrketî ra ame kîrakerdiş, wayîrê şîrketî dormarê merge de xendek kena û semedê ke dewijî nêxebetnî dormarê ci girewt. Bade ke merge welatijan rê amey girewtiş welatijî zî kewtî greva vêşanî.
Mîyanê dewe de 800 kes cuyenî û 5 hezar heywan est î û tena çimeya debarî sero dest ameyo ronayîş. Babete sero welatijî qalî kerdî.
Ma do têkoşîn bidî
Îlfet Yucel a 76 serre dîyar kerd ke dewa înan kerdî zîndano akerde û wina vat: “Ser na herre bi serran o ke cuyenî la nika ma bîyî sey dagirker. Heta nika çew nêameyo behsa herra ma nêkerdo û ma do herra xo ti kesî rê nêverdanî. Domantîya min na merge de vîyarto. Wazenî ke no weyekerdişê heywanan ke çimeya debara ma ya zî biqedênî û semedê pere herra ma qurbanê şîrketan bikî.”
Pêşkêşî sermayeye
Murtazak Ugrak zî ard ziwan ke bê zanayîşê dewijan mergê ma amey kîrakerdiş û wina vat: “Dormarê dewa ma de xendekî amey kenayîş, no semedî ra ma nêşkenî heywananê xo biçêrênî. Tena çimeyê debara ma weyekerdişê heywanan o û wazenî aye zî bibirnî. Kîrakerdiş û rotişê mergê dewe lazim bî sifteyîn dewijan ra biameynê persayîş. Labelê nêkerdî. Ma do semedê herra xo têkoşîn bidî. Ma do destûr nêdî ke mergê ma sermayeye ra bêrî pêşkêşkerdiş.”
Ma maxdûr bîyî
Welatij Hasan Taş zî ard ziwan ke semedê ke ê heywananê xo bidî çêrênayîş sewbîna herre çin o û ger ke no xesp peynî nêbo ê do heywananê xo biroşî. Dudu Teker a 65 serre zî wexto ke ê nêeşkerê heywananê xo biçêrenî aye wext ê dewe de se kenî.
Welatij Umît Teker a 35 serre zî ciresna ke ê semedê herra xo do canê xo bidî û xora semedê nêy neheqîyan bivindirnî 30 ciwanî kewtî greva vêşanî. Teker aşkera kerd ke ê dijî pergala axatî têkoşîn danî û do têkoşînê xo hera bikerî.
DÎHA/ÎZMÎR