Ma go bi hêvîya ke heme rocî bibê rocê cînî, bi hêvîya ke heqaret û tedaya mêrdan cînîyan ser ro wedaryo, bi hêvîya ke şerr û bêedaletî, zilm û kedwerdîya dewletan ma ser ro wedaryo 8’ê adare pîroz bikerê.
Ma go bi vîrardişê cînîyê kurdan ê qehreman û şoregeran rocê cînîyan pîroz bikerê. Ay cînîyanê ke heme waştişê xo yê şexsî kerdê fedayê azadîya şarê xo.
Ay cînîyanê ke semedê helmêke azad bikerê para şarê xo xo bê helm verda û bi hewayîşke zerrî ra xatir ma ra waşt û mîyanê pelanê zerdînan ê tarîxa şoreşê welatê xo de ca girot, go her tim vîrê ma de bê û go rayîrê ma roşin bikerê.
Ay cînîyê kurdan ê qeramenan ra çend tera zey Zerîfa, Bese û Leyla Qasime, Berîtan, Binevş, Mizgîn û Zîlane, Sema, Leyla, Fîdan û Sakîne û qehremane eyro yî Arîn Mîrkane yê ke go çiray ma vîr ra nêşêrê. Û tenêka bîne înan ra ke go çiray min vîr ra nêşêro.
Ti, hevala min a zerre tenik e! Ti, Gulistana heskerdanê xo û Dilistana (Estera Tîcî) welatê xo! Heta zerre min pirodo û heta ez helm bidî û bigîrî ti go her tim vîr û heşê min de bê û a nazikîya to, zerrnizmîya to û merdimhezîya to go min rê finak bo.
To bi şehadetê xo zerre malbata xo dicna û heskerdeyê to dicyayî la ma û ti pîya zanê ke rayîrê to rayîrê serberzî û bêmerdebûnî yo.
Loma ti rehet rako û hêvîya a roca weşe be ke go bi renganê gul û vilanê wesarî seranserê welatê to bixemelyo û go boya înan a weşe bêro to û heme cînîyanê şehîdan ê nê welatî.
Şima bi hewayîş şî û qehremanîyêka pîle yê dimayê xo rê verda. Wa sozê ma zî eno bo ke ma go layîqê aye qehremanîya şima bê û ma go rocê cînîyan rocêke ra vecê û heme rocanê serre ser vila bikerê.
Bi roşnîya şima ya ke şima dayo serê rayîrê ma heme heqaret, teda û bênirxdîtişê serê cînîyanê welatê xo û cînîyanê heme dinya ra wedarê.
Eka vengê linganê cînîyanê Kobanê ameyo şima û şima pê kêfweş bîyê.
Vengê linganê înan ke bîyo ters û lerzê çeteyanê DAIŞ’î ke sembola baykanîyan ke wazenê serê nameyê îslamî de kultirêke kolebûnîya cînî Rojhilatê Mîyanîne de rûnê.
Vengê ay lînganê îna go şêro heme cînîyanê Rojhilatê Mîyanîne û go heme mafanê xo yê rastînan bivînê û wayîr ro ci vecîyê.
Ma zanê rayîr o ke şima bi ganê xo yo nazik dayo vernîya ma, dîyarkerdişê ay rocî yo. Loma ma çiqas şima rê spas bikerê tay o.
Ver bi 8’ê Adare rocê cînîyanê dinya ma to û heme cînîyê cangorîyan anê xo vîr û ma vanê; “Wa heme gul û vilê wesarê welatê ma dorê to û cangorîyan ma yê bînan bipêçîyê û bibê cennetêke Gulistanan ra şima tede bê, Dilistana welatê xo.”