Bi paştedayîşê Şaredarîya Şaristanê Gird ya Amedî qezaya Pîran de Navenda Çand û Huner a Avdelayî abi. Navenda hunerî ke bi taybetî aşma hamnanî eleqeya gird nîşanê ci danîy de zaf xebat yenîy meşnayîş. Pirtûkxane de doman pirtûk wanenîy, bi rayîrê qursan ciwanî hacê muzîkî bander benîy û hetê înan de perwerdeyê ziwanê kurdî û folklorî zî yeno dayîş.
Keyeyî paşte danîy
No eleqeya vêşî ke ciwan nîşanê nê dezgeyê hunerî danîy, Nazim Kaçmaz ke bi Dîyanetî ra girêdaye qeza de melatî keno, eciz kerdo. Keyeyî bertekê xo hemverê vatişêy mela ya ke xutbeyê înî de vano: “Weyra cayê kesêy ke merdiman serabirnenîy o û weyra de domananê şima erşawenîy serê koyan” ard ziwan û vatîy ke mela bi zanayîş saetanê qursê muzîkî raştê qursê Quranî ano ke doman nêşîrî qursanê dezgeyî.
Bawer mekêne
Kordînatora Navenda Çand û Hunera Avdelayî Bahar Alturk derheqê no babetî ard ziwan ke mela rocê ke no dezge abîyo ra heta nika hêrişê dezgeyî keno û no hawa vat: “Domanîy tîya de muzîk, folklor, ziwan û zaf hetan de perwerde veynenîy. La roco ke no dezge abîyo ra naşt polîtîkayê leymin ya melayî dezgeyî sero domyenîy. Ger ke mela nê polîtîkayanê xo ra fek vera nêdo, ma do kirarîya qanûnî bidîy destpêkerdiş. Wa keyeyî bêrî xebatê ma biveynî ke yewna kesî ra bawer nêkîy.”