Hama cematê mûnafiqan nîya nêkerd.
Oya xanime rê reyê Hatîp Dîcle tirtî û rusnê Anqara.
Desta heqî Anqara de bextê to beno şa Oya xanim! Lew û pirnikanê tora bêro emegê sarê Amedî
Vengê lingan tirtene caverdîme, ebi req û teqîye kewtî baxçe, reyî guretî berdî.
Verê çimanê homete de. Tabî zerre de pêzevango qol YSK cire bî yardimkar. Cemato bêheq heqî ra nêterseno.
Tevera bekçîyê xo, zerre de pêzevangê xo esto. Ma ça ebi req û teqîye dizdenî mekero!!!
Dizdîye gegane jû huner o. Mordemo vêsan tireno, mordemo virran tireno. Se kerê, vêsanyê virranyê. Hama nî mordemî, se ke helbestvanê ma vano ‘verecoy vengê linjganê xo tirenê.’
Hama jû dizdo ke jê eskerê tirkî bi potînan req, teq, şarp, şurp ame û va ‘wayîrê baxçî ezu amu, wazen emegê to bitirî, vengê xo meke, bekçî û pêzevang hetê mi derê’ o mordem dizd nîyo zorvaz o. O hunermend nîyo.
Demokrasîya cematê mûnafiqan na wa.
Her tim vanê ‘ma haqa feqîr û fiqarî keşî nêdame, nêverdame kes haqa înan boro. Ma rast ke henyo! Nêverdanê kes boro, çike pêro ebi xo wenê.
Haqa mazluman xenîmê canê sima bo, ey mûnafiqenê.
Sîyaset de makyavelîzm na wo. Cematê mûnafiqan seweta jû kirşî meyîtu sero fetelîno. Çê sima birijîyo lawo.
Teyna zorvajîye ke bikerê onca mordem erzeno xo ver. Hama mexmurîya henene kenê ke, dest û payê mordemî cerîne.
Reyanê qomî ebi zorvajîye cenê benê, mebusan hepisxanan ra ranêverdanê, vanê ‘bêrê meclîse de meselan ser qeseybikeme, qomî sima çînîte we ke sima tever ra bifetelîyê.’
Ha simarê mexmurîye, ha simarê zorvajîya en girse. Emegê miletê ma ebi zorvajîye dest ra cenê, vanê ‘bêrê meselan meclîse de halbikeme.’
A meclîsa to qilêrin a, gonin a, heramwer a. A meclîse de her tim haqa feqîr û fiqarî werîye, a meclîse de qerarê tertelan ame guretene, a meclîse ebi simetena gonya kesê bînî hata ewro amê.
Sima bîlasevev mûnafiqî nîyê, kar û gurê sima xapiten a, tirten a.
***
Hetê Amed de onca esker û gerîllayî ameyî kistene. Çi beno bibo, sermîyan Recep Tayyip Erdoğan o. New serrîyo her mesela ano ra zon, hama qeyta jûye halnêkeno.
No bîyayîs tenê vatisanê hevala Kamer Genç, Tansu xanime ano ra mi vîri. Serranê newayî de waxto ke helîkopteranê dewleta tırkî Dersîm de dewê ma bomba kerdenê vêsnenê, Tansu vatenê ‘nî helîkopterê PKK yê Afganîstan ra am3, dewan vêsnenê.
Nika kî vanê ‘eskerî ebi bombanê destê gerîlla vêsnayena daristan de amê kistene.’
Guna vilê RTE dera!