Çend roje verê Tevgerê Azadîya Kurdî û 10 rayvistişê cîya amey têhet û dijî faşîzmî cepheyeke pêrabeste awan kerdî û bi îzehetêkî awanbîyîşê xo îlan kerdî. Her çend ke gameke normal bêro dîyîş zî gameke zaf muhîm a û dîrokî ya.
Wexto ke merdim tay nêzdî ra ewnîyeno, merdim muhîmîya ci hîna baş fam keno. Tirkîya de hetê pêroyî de nê 14 serrî û taybetî zî 7’ê Hezîrana 2015’î ra naşt dîktatorîya AKPe domyena. Taybetî şaristanê Kurdistan û heme Tirkîya de konseptêkî şerî yê taybet yeno meşnayîş. Çarçiweya no konseptî de heta nika bi seyan merdimî amey qetilkerdiş û ganî bi ganî ameyî veşnayîş. Rayna şaristanî bi tanq û topan ameyî xirakerdiş.
Heta nika goreyê no konseptê şerî şaristanê sey Farqîn, Gimgim, Cizîr û Sûrî ameyî xirakerdiş û nika zî dewleta dagîrker û çeteyê aye verê xo dayî Gever û Nisêbîn û wazenî weyra de zî îradeya kurdan ke dijî faşîzmî lingan ser o yo, linganê ci bibirnî û teslîm bigîrî. Sûr û Cizîr ke bi seyan rojan faşîzmê AKPe vera xover dayî û xoverdayîşê xo bi tîpê zerrnên reyde dîrok ra nuştî, hetê hêzê dewlete ra ameyî xirakerdiş û nika zî bin nameyê ‘Bedilyayîşê Şaristanawanî’ de wazenî nê cayan bikerî cayê rantî û bidî hetgirê xo.
AKPe Tirkîya de heme muxalîfan kerda hedefê xo
Tevgerê Şorişî yê Pêrabeste yê Şaran zî merdim eşkeno bivajo ke sey verpersêko topyekun o. Yanî hêriş û qetlîyamê topyekunî vera awankerdişê xoverdayîşê topyekunî yo. No semedî ra awanbîyîşê tevgerî zaf manidar o. Senî ke hukimatê AKPe Tirkîya de heme muxalîfan girewta hedefê xo û hêriş û qetlîyaman ser înan de dano ferzkerdiş se, dijî ci bi na game verpersê yewbîyayîşê bindestan o. Wexto ke merdim na çarçiwa de ewnîyeno, gameke ereykewte ya.
Eslê xo de dîrok de çend rayan teşebbusê inasarên virazîyayî. Lazim nêkeno merdim zaf şêro demo vîyarte, tena merdim nê 50 serranê peyênan biewnîyo, vîneno ke çend teşebusê awankerdişê nê yewîye esto. Sey finak, wexto ke merdim Hedîseya Kizildere ewnîyeno; Kizildere de rayvistişê TÎKKO, THKP-C û TKP-ML ameybî têhet û yewîyeya xo awan kerdî. La her çend ke nêresayî hedefe xo zî nîşan dayî ke kes an zî hêzê bindestî eşkenî hetê yewbînan de ca bigîrî û pêreyde xover bidî.
Xora yeno zanayîş ke wexto ke Kizildere de Mahîr Çayan û embazê ci ameyî qetilkerdiş û badê zî Denîz Gezmîş û embazê ci ameyî dardekerdişî ra dima, embazanê înan ra çew bi awayo xurt herinda înan pir nêkerd. Rayberê Şarê Kurdî Abdullah Ocalanî wayîrê mîrasê înan vejya û serra 1974 de ADYOD (Komeleya Wendekarê Welatperwer û Demokratîke yê Enqere) awan kerd.
Rayberê Şarê Kurdî na komele rê rayberî kerdênê
Eslê xo de Rayberê Şarê Kurdî Abdullah Ocalanî waşt ke nê kes û rayvistişî ke badê Denîz û Mahîran vila bî, bîyaro têhet û bin yew banî de pêra besto û wina zî kerd. Bin banê ADYODe de kes û rayvistişê cîya cîya ameyî têhet û yewîyeya xo awan kerdî. Rayberê Şarê Kurdî Abdullah Ocalan zî na komele rê rayberî kerdênê. Her çend ke hetê fermî de serek nêbi zî pratîkî de ê ke karê komele daynê meşnayîş û persê komele yew bi yew çareser kerdênê, o bi xo bi. Na komele dijî îqtîdarê aye çax ke rayberê tevgerê şorişgeran ser ra sey panzer vîyart vera veng û rengê xo kerdî yew û xover dayî.
Rayna serra 1982 de Rayberê Şarê Kurdî Abdullah Ocalan wazeno Tirkîya de dijî dîktatorîya 12’ê Êlule ke ser şorişgeran ra sey buldozeri vîyarena û merdiman de ters û vilabîyîşêko gird awan kena, tevgerêkî inasarên awan keno. Enîyê Xoverdayîşê Pêrabeste yê Dijî Faşîzmî (FKBDC) ame awankerdiş û çepê tirkan ra ame waştiş ke wa paştî bidî û mîyan de ca bigîrî. La serrê 1980 de semedê ke zafaneya şorişgeran hetê hukimatê Kenan Evrenî ra ya ameybî qetilkerdiş, ya zî ameybî tepiştiş. Tay ‘şorişgerî’ zî remaybî teberê welatî, yanî Ewropa. Ê ke şîbî Ewropa zî bin bandorê cuya kapîtalîzmî de mendbî û fek şorişgerî ra veradaybî. No semedî ra verpers nêdaybî vengdayîşê Rayberê Şarê Kurdî û Tevgerê Azadî.
Ganî no tevger sey qible bêro vînayîş
No tevger eslê xo de wayîrvejyayîşê mîras û xeyalê şorişgerê girdi sey Mustafa Suphî, Mahîr Çayan, Denîz Gezmîş, Yusuf Aslan, Huseyîn Înan, Îbrahîm Kaypakkaya û sewbîna ke xoverdayîşê xo de dijî faşîzmî de bi esasgirewtişê yewîyeya heme şarê bindestan meşnayî yo. Merdim eşkeno bivajo no tevger sey kombîyîşêkî xoverdayîşê bindestan ser o vêşî bîyo û ameyo awankerdiş. Mîyanê no tevgerî de rayvistişê sey TKP/ML - PKK – THKP-C-MLSPB – MKP – TKEP – LENÎNÎST – TÎKB – DKP – DEVRÎMCÎ KARARGAH – MLKP cayê xo girewtî. Ganî no tevger sey qible bêro vînayîş û dijî îqtîdarê Erdoganî ke eyro resayo duştê dîktatorî û her raybaz û kayê lêminî dano xebetnayîş de, her kes binê no tevgerî de cayê xo bigîro.
Çapemenîya AKPe kateyanê Qesrî reyde weye bena
Nê Finakî zî ma rê nawnenî ke yewîyeya ke roja ma ya eyroyên de ameya awankerdiş çende gamêke muhîm a. Wextê îlankerdişê awankerdişî de Endamê Konseya Koma Komelê Kurdistanî (KCK) Duran Kalkan yew vatişêkî dîrokî ardê ziwan, vatênê: “Awanbîyîşê Tevgerê Şorişî yê Pêrabeste yê Şaranî do faşîzmî biqehirno û semedê şarê ma zî omidêkî awan bikero.” û yew roje dima zî ma vîna ke na game faşîzmî û çapemenîya faşîstan mirdîya xo qehirna. Senî ke kutiko har hêrişê dormareyê xo keno, nê çapemenîyê ke kateyanê Qesrî reyde weye benî zî na game ser o har bîyî û hêrişê dormareyê xo kerdî.
Rojawan de destpêka awankerdişê yewîye
Badê 19’ê Temmuza 2012 de Rojawan de şoriş dest pê kerd û Rojawan bi çeteyan ra ame pankkerdiş. No pankkerdişî de xeylê hêzî cayê xo girewtî û muhîmîya pêreyde dayîşê têkoşînî ame dîyîş. Senî ke zanayê kurd Cegerxwîn vano ke ‘Ger ke ma nêbî yew, ma do şêrî yew bi yew’ no vatiş eslê xo bingeyê muhîmîya yewîye vet werte. Çeteyê ke qet erjê merdimîye ra bara xo nêgirewtî vera awankerdişê yewîye zî pêreyde têgêrayîş serkewtişî ard.