BÊRÎVAN WAN / BEHDÎNAN
Gerîla Îsyan Munzure ke Ewropa ra beşdarê gerîla bîya, 6 serrî yo ke warê Rojhelatî de ya û xeyalê aye o yo ke rojêkê Dêrsim de gerîlatî bikera. Herçiqas ke gerîla Munzure wazena Dêrsim de biba, reyna zî seba ke nê rojan de Rojhelat de îxtîmalê şorişî esto, nika nê xeyalê xo tayê taloq kerda.
Gerîla Munzure qala rewşa Rojhelatî kerde û vînayîşê xo arde ziwan.
Munzure vana ‘şarê rojhelatî şarêko welatperwer o, zanayîşê ci yê tarîxî hîra yo û piştî dano gerîla’ û wina dewam kena: “Her ke mi kesêkî nas kerd, zanayîşê mi zêde bî. Wina aseno ke ma Rojhelat zaf kemî nas kenî. Wexto ke Rojhelat yeno vatiş, ajanîya ke ti ra Besic yeno vatiş, yeno vîra ma. Rejîmê Îranî hişê ma de tersêko gird awan kerdo û nêwazeno ke vengêk daxî bivejîyo teber. Çimkî zano ke eke veng bivejîyo, do sirê ci xira bibo.”
Gerîlayê cinîyî hîna zaf avantajin î
Munzure dewamê qiseykerdişê xo de dîyar kena ke beşdarbîyayîşêko gird seba gerîla esto û wina vana: “Bitaybetî zaf tesîrê cinîyan esto. Nakokîya Soran-kurmancî ke hetê rejîmî ra erzîyaya mîyanê kurdan, bi xebatê PJAKî ameya derbazkerdiş. Cok ra xeylê kesê ke mekteb qedênayî û bêkar î, seba ke nêbî ajan, vanî ‘herinda ke ez do biba hemkar, ez do şiwanetî bikera’. Îran de gerîlayê cinîyî zaf avantajin î û hîna zaf hetê komelî ra yenî qebulkerdiş. Her çiqas ke hewl danî bi îdaman vernîya nêyî bigîrî, reyna zî îdamî netîce nêdanî. Heto bîn ra Îran dewletêka tewr zaf koç dano Ewropa yo. Bitaybetî şîyayîşê ciwanan karê dewlete yeno.”
Xoverdayîş beno ortax
Gerîla Munzure dana zanayîş ke êdî heme kurdî zanî ke înfaz, zor, îdam, çinîhesibnayîşê cinîye û cîyakerdiş polîtîkaya dewleta Îranî ya û wina vana: “Na rey xoverdayîş bi hawayo cîya zî bibo beno ortax. Cok ra îxtîmalê serkewtişî hîna berz o. Nêyî de tesîrê Şorişê Rojawanî esto. Nika dewleta Îranî hewl dana bi zext û tedayan vernîya ci bigîro. Seba nêyî xo zaf bihêz nîşan dana, labelê no veng o. Seba şarê ma yê Rojhelatî çîyo esasî tayê erj î. Seba nê erjan dayîşê bedelan ra nêremeno. Ez bawer kena ke do demêko kilm de Rojhelat de zaf çîyî bibedilyî; çimkî çîyê ke demê peyênan de qewimîyayî ver ez zaf heyecanin a.”