Koordînasyonê Komalê Ciwanî derheqê Hemleya Sere Wedarne ke bi Komalê Cinîyanê Ciwanan reyde daybî destpêkerdiş de îzehetêko nuştekî da.
Koordînasyonî îzehetê xo de dîyar kerd ke çarçewaya hemleye de Kurdistan û waranê bînan de çalakîyê muhîmî benî û wina dewam kerd: “Kerkûk ra heta Şehba, Efrîn ra heta Almanya heme ca de sloganê ciwanan olan dayî. Ciwanî seba ke Rayber Apoyî ra xebere bigîrî, sere wedarnayî. Nika Rojawan û Vakurê Sûrîye de zî rayberîya YCR û YJCyî de rayşîyayîşê dergî yenî kerdiş. Ciwanê lacekin û keynekî bi meşaleyan erdê Kurdistanî ser rayîr şonî. Her ciwan vera koletîye de sere wedarnayo. Ciwanê ke îzehetêk danî û yenî koyan, vera dagîrkerîye de têkoşîn danî.”
Koordînasyonî dewamê îzehetê xo de wina va: “Bitaybetî Vakurê Kurdistan û Tirkîya de çarçewaya Hemleya Sere Wedarne de xeylê çalakîyê ziqaqî ameyî kerdiş û ciwanî vera rejîmê faşîstî de hertim payan ser de bîyî. Amed, Erxenî, Wan, Îzmîr, Buca, Manîsa, Mugla, Antalya, Bursa û Stenbol de çarçewa na hemleye de wesayîtê ke aydê dişmenî bî, ameyî veşnayîş û fabrîkayê ke parçeyê ekonomîye yî, ameyî veşnayîş. Reyna ciwano ke ajanîye kerdêne, teslîmê yewîya DGHyî bîyo û waşto beşdarê Hemleya Sere Wedarne bibo. Cayê ke fuhûş dîyayêne kerdiş ser de operasyonê şorişgêrî ameyî kerdiş. No proses ra pey ciwanê Kurdistanî do bi hawayo hîna radîkal beşdarê Hemleya Sere Wedarne bibî.”
Ciwanê Başûrî azadîya Rayber Apoyî waştî
Koordînasyonî bale ant ser ciwanê Başûrî ser û wina va: “Başûrê Kurdistanî de her bajar û qeza de çalakîyî ameyî kerdiş û azadîya Rayber Apoyî ame waştiş. Heto bîn de qereqolê dewleta tirkî ke Başûr de yî, ameyî protestokerdiş. Ciwanî vejîyayî rasteyan û dagîrkerdişê Efrîn û qezayanê ci protesto kerdî. Ciwanê welatperwerî seba ke xo bipawî çarçewaya hemleya Sere Wedarne de veng dayo heme ciwanan. Reyna na aşme 2 grûbî vera xo dayî koyan û beşdarê gerîla bîyî. Nika ra pey seba azadîya Rayber Apoyî û seba ke dewleta dagîrker Kurdistan ra bêro qewirnayîş, çi destê ma ra bêro ma do bikerî.”
‘Ma ciwananê çalakgêran silam kenî’
Koordînasyonî îzehetê xo de ard ziwan ke Ewropa û Rûsya bi hawayo baş destek da hemleye û wina va: “Reyna Kampa Mexmurî zî beşdarê hemleye bî. Tewr peynî cinîyî 25ê Teşrîna peyêne de vejîyayî raşteyan û têkoşînê cinîya azade berz kerdî. Nê çalakîyê ke çarçewaya hemleye de bîyî, bi hawayo bihêz bîyî. Cok ra ma heme ciwanê ke beşdarê hemleye bîyî silam kenî. Ma heme ciwanê Rojawan û Başûrê ke nika rayîr şonî silam kenî. Nê rayîrşîyayîşî ruhê şorişgêrî yê Hemleya Sere Wedarne nîşan danî. Ancax bi beşdarbîyayîşê ciwanan Hemleya Sere Wedarne bena cewabê Rayber Apoyî û şarê ma rê rayberî kena.”
ANF/BRUKSEL