LALEŞ RÊNAS SEMA / MEXMÛR / GABAR
Hêzanê Xopawitişî yê Mexmûrî ra Ferhan Diderî vist vîrî ke dewleta Tirkî ya ke hetê Erdoganî ra yena îdarekerdene, heme destkewteyê Kurdan hedef girewtî û sere de PDK û pêşmergeyî heme Kurdan ra waşt ke wa na raştîye bivînê û goreyê naye têbigêrê.
Ferhan Diderî muhîmîya rolê gerîlayî vist vîrî û wina va: “Gerîla pêroyîya Kurdistanî paweno. Ma zana ke dewleta Tirkî ya ke hêrişê Xakurkê, Xinêrê, Heftanîn, Metîna û Qendîlî kena bi naye qîmê xo nêana. PDK bi polîtîkaya xo paştî dano hêrişkaran û vernîya înan akeno. Demo ravêrte de ma Kurdî xo mîyan de kewtî têmîyan, ma yewbînî kiştî û hemeyan naye ra zirar dî. PKK, YNK û PDK naye ra zirar dîyî. Nika ma o wext de nêyî.”
Diderî bale ante xoverdayîşê Şeladizê ser û wina va: “Şarê Başûrê Kurdistanî ganî sey wextê Şeladizê vera hêrişan de sere wedarno. Tirkî hem wazenê Kurdîstan dagîr bikerê, hem zî Kurdan biverdê yewbînan. PDK ganî çimanê xo abikero, na raştîye vîno û vera hêrişan de bêveng nêmano. Tena PKK nê, heme qezencanê Kurdan hedef gênî. Tarîx do rojêk ê ke Kurdan rê îxanet kene, înan ra hesab biperso. PDKyî heme cayê xo yê Metîna dayî Tirkan. Heta kincê xo zî dayî înan. Ganî heme Kurdî biwerzê lingan ser.”
Wa PDK destê xo îxanetî ra bianco
Diderî qiseykerdişê xo wina qedêna: “Rojhelato Mîyanên de Kurdî hêzo hîreyin ê. Kurdan DAÎŞî rê da vînîkerdene û dima ra weçînitiş de Erdogan rê zî da vînîkerdene. Coka ganî yewîya neteweyîye bîbo. Dişmen Kurdan cîya nêkeno hemînan hedef gêno. Wextê referandûmî de Erdogan û dewleta Tirkî seba îdareyê Başûrê Kurdistanî çîyê ke vatî û heqaretê ke Barzanî rê kerdî werte de yê. Pêşmergeyî zî ganî naye xo vîra nêkerê û bi kayanê înan nêxapyî. Dişmenî dir wertaxîye nêbena. Wa PKD destê xo îxanetî ra bianco.”