Rijnayîşo ke Qezaya Nisêbînî ya Mêrdînî de dîya destpêkerdiş ver zafaneyê qezaye ame talankerdiş. Dewlete herinda bananê şarî de bê destura şarî awanîya TOKÎyan virazena û bi no hawa hewl dana demografîyaya qezaye xira bikera.
Awanîyê ke bê binêsazî yenî viraştiş ra heta nika bi desan cenazeyî ameyî vetiş. Çend rojî verê Qeymeqamê Qeza, Serekê Daîreyê Mudurîya Vurîyayîşê Bajarî û Koordînatorê Şirnexî Mehmet Aydin, Serekê AKPyî yê Mêrdînî Mehmet Alî Dundar û Serekê AKPyî yê qezaya Nisêbînî Mehmet Latîf Ozel taxê Abdulkadîr Paşa, Dîcle, Yenîşehîr û Firatî ke tede awanîyî yenî viraştiş de gêrayî. Nê heyetî dîyar kerd ke ê do awanîyan destpêkê serneweyî de teslîmê şarî bikerî.
Nizdîyê 4 hezar 700 awanîyî yenî viraştiş û nîno zanayîş ke do nê awanîyî senî bêrî dayîş. Çimkî hîna kesê ke îmze nêeştî, estî û rewşa nînan dîyar nîya. Mehmet Alî Dundarî zîyaretê xo de dîyar kerdbî ke bi nê awanîyan do bajar hîna zaf modern biaso, labelê qet qala cenazeyê ke binê înşatan ra vejîyenî nêkerd.
Seke yeno zanayîş heta nika 8 cenazeyî ewja ra ameyî vetiş. Herçiqas ke heta nika xeylê reyan şarî seba cigêrayîşê cenazeyan veng da, labelê reyna zî viraştişê awanîyan nêame vindarnayîş. Reyna netîceyê teqayîşê cîsmê ke taxan de yenî dîyayîş ver 2 domanî merdî û bi desan domanî zî birîndar bîyî.
JINNEWS/MÊRDÎN