Bexçeyê Hewselî û Newala Dîcle ke hetê Wezîrîya Dorme û Bajarî ra sey ‘Warê Projeyo Taybet’ ameybî îlankerdiş de merhaleyo yewin temam bî. Koyê Çewresan de bin nameyê xebata peyzajî de darî ameyî birnayîş, herinda înan de camî û tesîsî ameyî viraştiş. Wezîrîye do Hewsel de 31 hektar war seba nê projeyî bixebetno. Babete ser o endama MYKyî ya HDPyî û Aktîvîsta Ekolojîyî Beyza Ustune qisey kerde.
Ustune va ‘Sermaye bi serran o ke hewl dano bikewo Hewselî mîyan’ û wina dewam kerde: “Hewsel 2012 de sey warê rezerveyî amebî îlankerdiş û 2013 de zî makîneyê înşaatî kewtî bexçeçî mîyan. Hewsel bi hezaran serran o ke tebîetê na herême yo û lîsteya mîrasî ya UNESCO de yo. Serra 2013 de wendekaran nêverdaybî makîneyî bikewî Hewselî mîyan, labelê nika reyna kewtî. Verê camî, dima ra otel û keyeyî yenî viraştiş û teslîmê burjavayan bêro kerdiş.”
Bin tehluke de yo
Ustune dewamê qiseykerdişê xo de va ‘merhaleyo yewin yê projeyê Hewselî do tebîî û tarîxîya Sûrî xira bikero’ û wina domnaye: “Wazenî tîya de bajarêko newe bivirazî û demografyaya herême newe ra awan bikerî. Eke wina bikerî do estena çem, pird û çîyê tarîxî yê sewbîna çinî bibî. Nêyî ra ti kes feyde nêvîneno. Do netîceyê rijnayîşî giran bibo. Ez vera bêvengîya UNESCO de veng dana şarî ke wa piştî bidî şarê Sûr û Hewselî.”
ŞÛJIN/AMED