Endamê Komîteya Caardişî ya PKKyî Murat Karayilanî derheqê serrgera 40. ya Awanbîyayîşê PKKyî, tecrîdo ke Rayberê Şarê Kurd Abdullah Ocalanî de yeno meşnayîş, hêrişê dewleta tirkî yê Efrînî ser o û sewbîna babetan de qisey kerd. 

Endamê Komîteya Caardişî ya PKKyî Karayilanî dîyar kerd ke ê Kombîyayîşo Normal yê Komîteya Merkezî ya PKKyî de tayê qerarî girewtî û çarçewaya nê qeraran de ê wazenî emser bikerî serrêka girde û wina va: “Hem hetê têkoşînê şarî ra hemleyêka rêxistinî aver bîşêrî û hem zî ma wazenî gerîla de gamanê neweyan bierzî. Gerîla prosesê newebîyayîşî de ver bi peynî şono. Goreyê şert û mercanê neweyan gerîla xo eyar keno. Ma wazenî serra 40. bikerî serra têkoşîno gird û serra hemleyêka girde.”

Karayilanî dewamê qiseykerdişê xo de ard ziwan ke selahîyetdaranê dewlete mîyanê 40 serran de zaf reyan vatişê sey ‘ma ameyî peynî, ma do PKKyî çin bikerî’ vatî û wina va: “AKP û selahîyetdaranê ci zî zaf reyan nê vatişî dibare kerdî. Vera heqîqeta Kurdistanî de zorê dewleta tirk şîyo. Labelê dewleta tirk bi hîrê esasan şerî domnena. 3 esasî nêyî; îstîxbarat, teknolojîyê şerî û şero taybet. Bitaybetî beşa şero taybet ser zuran ra yeno domnayîş. Tabî şêrêk esto û no şer de şehadetê gerîlayan zî beno. Labelê dewleta tirk herçiqas ke vînîbîyayeyê aye zaf î zî hertim vana 2 hebî yî.”


Besta de operasyonêko gird esto

Karayilanî bale ant operasyono ke Besta de yeno domnayîş ser û wina va: “Seke yeno zanayîş Besta de 3ê Teşrîna peyêne ra heta 16ê teşrîna peyêne operasyonêko hîra dewam kerd. Vera nê operasyonî de gerîlayan zî tayê çalakîyî viraştî. Bitaybetî çalakîya 12ê teşrîna peyêne de 8 leşkerî merdî û helîkoptera ke derbe girewte, beno ke ginaya waro zî. No şer de 13 gerîlayî şehîd kewtî. Labelê çapemenîya tirk sey ke 40 gerîlayî şehîd kewtî nîşan dayî. Ê bi no hawa vînîbîyayeyanê xo niminenî. Ê bejahî ra nêşênî bêrî ma ser de, cok ra wazenî hewa û teknolojîyê şerî reyde serbikewî. Ma zî vera înan de bi hêzê merdiman, îrade û aqilî reyde têkoşîn danî.” 


Dewleta tirk ra dure bivinderê

Karayilanî qiseykerdişê xo de veng da heme kurdan û wina va: “No proses de yê ke nêwazenî ziwan û kulturê xo xayînî bikero, ganî hetê AKPyî de nêvindero. Yê ke mîyanê AKPyî de yî zî ganî raştî bivînî û AKP ra biqerfî. Çimkî AKP dişmenîya kurdan de MHPyî ra kêmêr nîyo. Ma kurdî zî ganî serra 40. de yewîya xo awan bikerî û seba azadbîyayîşê Kurdistanî û demokratîkbîyayîşê Tirkîya, reyna seba azadîya Rayber Apoyî qezenç bikerî. Cok ra ganî herkes wayîrê berpirîyarîya xo bivejîyo .” 



Do Efrîn de zorê dewleta tirkî şêro


Karayilanî qiseykerdişê xo de qala hêrişê dewleta tirkî yê Efrînî ser o kerd û wina va: “Senî ke kurdî seba Kobanê bîyî yewe, do seba Efrînî zî wina bikerî. O wext do no şer bibo şerê dewleta AKPyî û yê kurdan. Eke wina bibo o wext şer tena Efrînî reyde sînordar nêmaneno. Xora ê zî seba ke îradeya kurdan bişiknî, hêrişê ewja kenî. Wa şarê Efrînî xo ra bawer bikero. Ma do pey înan de bibî û do Efrîn de zorê dewleta tirk şêro. Na dewlete hîna nêşêna bikewa mîyanê Şirnexî, do senî bikewa Efrîn. Xora hêzêko winasî yê ci çin o. Wa şarê ma bawer bikero.”



Ma heme tecrîd ra berpirsîyar î 


Karayilanî qiseykerdişê xo de qala tecrîdî kerd û wina va: “Ganî şarê Vakurê Kurdistanî bizano ke eke ewro Îmrali de tecrîd yeno domnayîş, nêyî ra ma heme berpirsîyar î. Raşt o berpirsîyarê sifteyînî kadro û îdarekarê nê tevgerî yî. Labelê berpirsîyarîya şarê ma zî esta. Ganî her kurd, cinî, ciwan, welatperwer û yê ke wazenî ke aştî û demokrasî bêrî Tirkîya, heme berpirsîyar î. Ganî herkes vera dişmenî de xo bihêz û rêxistine bikero û bêrî têhet û bibî îrade. Dewleta tirk wazena mabênê şar û Rayberîye de dês rono. Ganî şar nêyî qebul nêkero. Bêvengî yena manaya qebulkerdişî. Cok ra ganî heme welatperwerî destê xo bierzî binê kerraye.”


ANF/BRUKSEL