Dayîkanê ke raştê hêrişê polîsan ameyî ra Aysel Tufana ke domanê aye xoverdayîşî mîyan de yo, va ‘ê ke hêrişê ma kerdî, dîyar beno ke çiqas ma ra tersenî’. Dayîke Hayrîye Demîre zî wina va: “Se beno wa bibo, domanê ma do ser bikewê. Seke ma her tim vanê xoverdayîş cuyayîş o.

Vera tecrîdî de çalakîyê grevê vêşanîye ke xeylê cayan de dîyayî, destpêkerdene, dewam kenî. Çalakîya Parlamentera HDPyî Leyla Guvene roja 182. de, Başûrê Kurdîstanî de çalakîya Nasir Yagizî roja 169, Ewropa de çalakîya Îmam Şîş û 14 çalakwananê Strasbourgî roja 143, Mexmûr de çalakîya Fadîle Toke 109, çalakîya Yusuf Îbayî zî roja 117. de dewam kena.

Çalakîya ke zîndananê Kurdîstan û Tirkîya de dîyayî destpêkerdiş zî roja 144. de ya. Hepsîyan ra 15ê ci çalakîya xo açarnaya rojeyê mergî û rojeyê mergî zî roja 9. de dewam keno. Dayîkê hepsîyê ke grevê vêşanîye de yî zî rasteyan de yî û seba ke bale biancî çalakîya domananê xo, çalakîyan virazenî. Dayîkî raştê hêrişan polîsan yenî.

Dayîkanê ke 5ê Gulane de Parka Koşuyolu de raştê polîsan ameyî ra Hayrîye Demîre, Yaşar Akboga û Rabî Ataşe gerreyê polîsanê hêrişkaran kerd. Dayîke Aysel Tufane zî raştê hêrişanê polîsan ameya. Aysel Tufane û Hayrîye Demîre vera hêrişanê polîsan de reaksîyon nîşan dayî.

Ma wazenî ke wa domanê ma bicuyî

Tufane va ‘domanê ma ewja de vêşan bî, ma senî tîya de ronîşenî’ û wina dewam kerde: “Ma zî do nêronîşî û xover bidî. Dayîkî do vengê domananê xo û Leyla Guvene bidî eşnawitene. Ganî ma demêko raver mizgînî bidî domananê xo. Ma dayîke yî, domanê ma mirenî. Ma zaf çî nêwazenî. Ma wazenî ke wa domanê ma bicuyî.”

Wa herkes destê xo rono wijdanê xo ser

Tufane bale ante hêrişan ser û wina va: “Na dolbende 30 serrî yo sereyê ma ser o ya û sembolê aştî ya. Ez her tewir şîddetî şermizar kena. Înan ez erd ra kiranta û pey ra paşkulî dayî mi ro. Gelo ê polîsî senî pîl bîyî. Ma aştîye wazenî û wa êdî zerrîya dayîkan nêdejo. Parlamenterê ma hetê ma de yî. Yew serre yo ke weçînîyayî, labelê înan hîna Meclîs nêdîyo. Ê ke hêrişê ma kerdî, dîyar beno ke çiqas ma ra tersenî. Ez do hertim rasteyan de biba. Wa herkes destê xo rono wijdanê xo ser.

Ez semedê domananê xo xover dana

Dayîkan ra Hayrîye Demîra ke 3 domanê aye zîndanan de yê, viste vîrî ke aye emrê xo vernîya berê zîndanan de ravêrnayo û wina domnaye: “Pî û mêrdeyê mi bi îşkence merdî û ez semedê domananê xo qesewet kena. Kênaya mi 15 serrî ceza girewte û 10 serrî yo zîndan de ya. Yew lajê mi 36 serrî ceza girewte û 26 serrî yo zîndan de yo û lajê min o bîn zî 6 serrî û nêm ceza girewte. Nika ez her çîyî ra verê semedê domananê xo xover dana.”

Domanê ma do ser bikewê

Dayîke Demîre wina dewam kerde: “Lajê mi Dînar 67 rojî yo ke grevê vêşanîye de yo. Ez çend rojî cuwa ver şîya dîyayîşê înan, tepişteyî zaf bîyî zehîf. Xoverdayoxê ke grûba verêne de yê, halê înan hîna giran o. Gama ke ez lajê xo û embazanê ci wîna vînena, zerrîya mi vêşena. Xoverdayoxî semedê bêvengîya teberî bihêrs ê. Ma ganî bibê vêngê înan. Wa ne dayîkê kurdan, ne zî dayîkê tirkan mebermê. Ma aştî wazenê. Eke çîyêk domananê ma bibo qet manaya cuya ma nêmanena. Wa zerrîya dayîkan meveşo. Wezîrîya Edaletî û welatê Ewropa wa goş bidê vengê ma. Wa domanê ma memirê. Wa herkes xo bikero herinda ma. Peynîya ci se beno wa bibo, domanê ma do ser bikewê. Wa Leyla Guvene biciwîyo. Seke ma her tim vanê xoverdayîş cuyayîş o.”

 

AMED