Cenazeyê gerîla Ramazan Karadag (Piling Sûr), Îbrahîm Gultekîn (Dogan Amed), Şevîn Akdamar (Nujîn Solîn), Semra Elalmi (Peyman Kurdistan) hetê seyan welatijan berdîyay Mezelxaneyê Yenîkoy yê Amedî. Bi seyan polîsan bi wesayîtanê zirxî û TOMA çormeyê mezelxane girotî. Herzewbîn wextê merasîm de helîkopterî zî perrîyay. Parlementeranê HDP yê sûk Feleknas Ûca, Zîya Pîr û Sîbel Yîgîtalp ra pîya îdarekarê HDP û DBP, Meclîsê Mayanê Haştî, temsîlkarê MEYADER, TUHAD-DER û bi hezaran welatijî tewrê merasîm bî.
Cenazeyê ke morgî ra amey girotiş berdîyay camîya Mezelxaneyê Yenîkoy. Cenazeyê gerîlayanê YJA Star ser doşanê cinîyan de bi tilîlî û slogananê zey ‘ "Ey şehîd gonîya to erdî de nêmanena’, “Cinî ciwîyan, azadi" berdîyay.
Rayîra Bêrîtan de şî
Karadag, Gultekîn, Akdamar û Elalmiş pêhet de amey definkerde. Waya Ramazan Karadag wextê merasîm de bi lorikan va, ’Enê veyve û zavayê Kurdistanî yê. Enê rûmetê ma yê. Mebermê. Karadag da zonayen ke tenya waştena eyî resayişê hardê xo bi.
Ramazan Karadagî herzewbîn xoverdayişê Sûrî de zî ca girotbi û verîya 3 aşman şibi Dersim û tewrê gerîlayan bibi. Badê merasîmê definkerdişî dûayî amey wendiş. Hemseroka MEYADER Ayşe Dîcle îta de qisey kerd û hayr ant polîtîkayanê qilêrîn yê AKP ser û va, yê ke şehîd kewtîyê rayîra Bêrîtan de şî. Dîcle veng da AKP û va, ‘endî na leyminî ca verdê. Şima cenazeyanê şarê kurd ra, domanê pîzeyê maya xo de ra zî tersenê. Nê gencan serranê tewr rindek yê emrê xo day. Ma zî soz danê ke ma dê tekoşîna înan dewam bikerê. Merasîm ra dima malbatan aw rijnay ser mezelê domananê xo û wextekê derg mezelî ser ra nêabirîyay.
Licê û Karaz de defin bî
Cenazeyê gerîlaya YJA Star Şenay Laleşahîn (Seyîtxan Amed) zî şewa verî girotîya û berdîya qezaya Amed Licê. Cenaze hetê seyan kesan dewa Huseynik de defin bî.
Seba gerîlayê HPG Mahmût Bîlgîn (Seyitxan Amed)î zî dewa Karaz Dewelê de merasîm virazîya. Badê ca ardişê wecîbeyanê dînî cenaze hetê welatijan berdîya mezelxane û bi slogananan defin bî. Bîlgîn verîya 4 aşman tewrê gerîlayanê HPG bibi.
Cenazeyan rê zî tehemul nêkenê
Cenazeyê gerîlayê HPG Yavuz Unas (Rûbar Hanî) zî roja verî hetê malbata ci Dezgeha Tiba Edlî yê Meletî ra amê giroten û berdîya qezaya Amed Hênî. Vizêr sodir mezelxaneyê qeza de cenazeya Ûnasî defin bî. Yavuz Unas o ke 18 serre yo, verîya serrekê nîm tewrê gerîla bibi. Cenazeyê gerîlaya YJA Star Dîlan Akkoç (Destan Agît) zî şewa verî berdîya Amed. Konvoya cenaze wextekê derg ser raya Amedî de vindernîya. Seatanê sodir de zî cenaze berdîya dewa Terzîyan û bi sloganan kişta merdimê ci Agît Amed ke 2010 de şehîd kewt het de defin bî.
Merasîmê cenaze yê Sûltan Gokturk (Jin Şirvan) zî hetê polîsan amê manîkerdiş. Malbata Gokturk ke cenaze Meletî ra girot berdî qezaya Riha Serêkanî. Rîwalê zext û tehdîdanê polîsan cenaze bi şew seat 03.30 de bin eblûqeya polîsan de defin bî. Herzewbîn polîsan ronayişê xêma serweşî zî manî kerd. Malbata Gokturk tazîyeyan keyeyê xo yê taxa Ensar de qebûl kenê.
AMED / RIHA
‘Raya sima raya ma ya’
Gerîla Sefkan Dersim (Cemal Kaya), Şiyar Dersim (Ûgûr Akgunduz) û Roza Helîn (Dîlek Gunenç) zî Dersim de oxir bî. Merasîma cenaze de sozê girêdayişê tekoşîna înan ame dayen. Seba gerîlayan Cemxane de merasîma toren virazîya.
Parlamenteranê HDP Berdan Ozturk, Ayşe Acar Başaran, Alîcan Onlu, Hemşaredarê Dersim Nurhayat Altun ve Mehmet Ali Bul, îdarekarê HDP û DBP ra pîya bi seyan kesî tewr bî.
Parlamenter Onlu ke merasîm de qisey kerd hayr ant tekoşîna şehîdan ser û nîya va: “Raya sima raya ma ya, raya ma raya Seyît Riza, Alîşêr, Mazlûm Dogan û yê Sakîneyan a. Eke Yezid esto se, zilim esto se, dûştê Yezidî koyanê ma de gencê ma yê egîd kî estê.” Onlu vist vîrî ke 1937-38î ra na het xoverdayişeke esto û bi nê vatenan qiseyê xo qedînay: “No xoverdayiş seba erja, zon, kultur û îtiqatê ma do biramo. Wa rayîra sima akerde bo. Ma dê hewl bidê ke layiqê sima bê.”
Cenazeyê Sefkan Dersim dewa Venk de, yê Roza Helîn Çemişgezek de dewa Eginik de û yê Şiyar Dersimî zî bi sozê girêdayenê tekoşîna înan dewa Mîllî de defin bî.
DÎHA / DERSIM