Domanî bi akerdişê Wendegehê Sporî kêfweş bîyê

Mîyanê 2 aşman de 400 domanî asnaw musayî. Domanî ke kurs bi serkefte qedînayê sertîfîkayê xo girewtê û dayîşê no xizmetî ver zaf kêfweş bîyê.

Mudirtîya Şaxa Sporî a ke Serekîya Daîreyê Karê Cemat sero bin banê Şaredarîya Şaristano Gird a Amedî de xebatan kena, xebatêy xo domnena. Mudirtîya Şaxa Sporî, emserr Wendegehê Hamnanî yê Sporî de kursê futbol, basketbol, tenîsê masayî, satranç, karete, tekvando, atletizm, obezite, tenîsê kortî, badminton, asnaw û jimnastik da domanan.

Domanê ke emrê înan mabênê 7-14 serran bi kursî ra îstîfade kerdê. Merasîmê dayîşê sertîfîkayan Salona Sporî ya Şilbe de virazîya. Koordînatorê Sporî yê Mudirtîya Şaxa Sporî Ercan Baranî îzeh kerd ke înan mîyanê hewteyî de 2 roj honza Wezaretê Spor û Ciwanan de perwerde dayo, perwerde ra ver şimik, şort, tîşort û verçimikî dayê domanan. Baranî wina vat: “Ma pê serwîsan domanî ardê kursan. Heme mesrefê domanan hetê Şaredarîya ma ra ameyo ca. 

Domanî ke beşdarê kursê asnawî bîyê pêro zî asnaw musayê. Ma do serra 2016 de onca semedê domanan kursanê asnawî abikere. 

Tenya 2 aşmî ney, ma wazenê serra duwês aşme perwerdeyê asnawî bide domanan” 

 Zaf kêfweş bîyê

 Domanan ra Şevîn Şeker, Yusuf Kiliç û Onder Karabaş vatîy semedo ke ma asnaw musayî ma zaf kêfweş bîyê. Kişta bîne ra 32 domanî ke kursê jîmnastîkî girewtê zî sertîfîkayê xo destê Sereka Daîreyê Karê Cematî Semra Kiratli, Mudira Şaxa Sporî Ayten Tekeş û perwerdekar Fîlîz Ozer ra girewtê. 

 AMED