Xoverdayîşê Gezî ke kewt serra xo ya 5. de bi hezaran kesî ameybî tepiştiş, birîndar bîbî û derheqê înan de bi desan dozî abîbîy. Goreyê raporo ke hetê rêxistinê heqê merdiman ra ameyo amadekerdiş; netîceyê xoverdayîşî de 11 kesî merdî, 43ê ci giran 8 hezar 163 kesî birîndar bîyî û derheqê 5 hezar 653 kesan de zî 97 dozî abîyî. Her çiqas ke hende neheqîyî bîyî, reyna zî derheqê wezîfedaran de doze nêabîye.
-Polîso ke gazê îsotî eştbî Ceyda Sungura ke ‘cinîya ke cilê sûrî piradaye yî’ ameye şinasnayîş rê 20 aşmî cezaya hepsî û cezaya ronayîşê 600 daran dîyaye ci. Labelê doktorê ke camî mîyan de mudaxaleyê birîndaran kerdî rê 10 aşmî cezaya hepsî dîyaye.
-Zabitayê ke çadiranê çalakvanan veşnayî, beraat kerdî. Endamê Grûba Çarşî ra Cem Yakişkan, Numan Bulent Ergenç û Halîl Îbrahîm Erol zî tede doza ke derheqê 35 kesan de abîye, bi beraat netîce bîye.
-Hedîseyê Berkîn Elvanî de doza polîs Fatîh Dalgaliyî 4 serrî ra dima ameye dîyayîş. Mehkeme talebê ke derheqê tepişîyayîşê polîsî de ameyî, red kerde. Roniştişê dîyin yê doze do 6ê temuze de bêro dîyayîş.
-Ahmet Atakan Hatay de ame kiştiş. Her çiqas ke şahidê kişîyayîşê Atakanî estî zî, heta nika tehqîqat de ti averşîyayîş çin o.
-Alî Îsmaîl Korkmaz hetê kesê ke destê înan de zope estbîy ra amebî qetilkerdiş. Dîmenê hedîseyî ameyî pakkerdiş. 4ê ci polîs, pêro pîya derheqê 8 kesan de doze abîye. Polîsan rê 10 serrî ceza dîya, kesê sîvîlan rê zî 6 serrî 8 aşmî ceza dîya. Dima ra cezayê înan ameyî kêmîkerdiş.
-Ethem Sarisuluk zî hetê polîs Ahmet Şahbazî ra amebî qetilkerdiş. Mehkeme verê cû 21 serrî ceza daye Şahbazî, labelê dima ra na ceza arde 7 serrî 9 aşmî û 10 rojî. Dima ra qerar hetê Yargitayî ra ame xirakerdiş û Şahbaz ame tehlîyekerdiş. Tewr peynî 1 serre û 4 aşmî û 20 rojî ceza dîyaye Şahbazî.
DÎHABER/STENBOL