Parlamenterê HDP Ayhan Bîlgen ke derheqê derbeya Seray de qisey kerd vist vîrî ke dûştê derbe tek çare paştdayen û xoverdayiş o.
Hikûmeta AKP û Seray’a ke hetê Reîscûmhûrê Tirkîye Tayyîp Erdogan’î yena îdarekerden serva ke polîtîkayanê xo yê faşîstîn ferz bikerê dûştê îradeyê şarî derbe vistî dewre. Çarçoveyê na derbe de hewl danê ke parlamenterê HDP ke bi nameyê demokrasî û azadî hetê 6 mîlyon weçîntoxan amey weçînayen bêveng bikerê, meclîs ra çekerê. Parlamenterê HDP yê Qers Ayhan Bîlgen ke derheqê babed de ANF rê qisey kerd vist vîrî ke derbeya ke şexs dê HDP de yena ramiten pêrokîn civakî hedef gêna.
Tirkîye kirêşenê kaosî
Bîlgen’î aşkere kerd ke darbeya ke bin nameyê destnêdayişî de yena ramiten netîce û leteyê polîtîkaya êrişanê topyekun ke dûştê kiştanê mûxalîf, akademîk û çapemenî yena ramiten a. Bîlgen’î vist vîrî ke bi na derbe AKP wazena dînamîkê civakî ke danê xover û vengê ci yê parlementoyî bibirno û qiseyê xo wina dewam kerdî: “Demekê nêayseyî de rewşekê fîîlî akerdî, Dadgeha Berz, Şûraya Dewlet û eskerîye kerdî leteyê na planî. No zî etabê bîn yê demê derbe yo. Bi no şiklî Tirkîye kirêşenê kaosî. Babeda destnêdayişan zî leteyê na kaosî ya. Jû bi jû girotişê alwozanê ma, ardişê ci yê sîyasetnêkerdiş, helwestê dûştê hemşaredaranê ma pêrokîn girêdayê eynî konseptî yê.”
Bêvengî yena maneya bedelê girdî
Parlamenterê HDP Bîlgen’î da zonayen ke cîyakarîya parlementeran çînya û va la no çinî hesibnayişê îradeyê şarî û weçîntoxan o. Bîlgen’î da zonayen ke no nîno qebûlkerden û wina va: “Qebûlkerdiş û normalvînayişê na rewşî nêbeno. Wazenê xêlê parlementeran ceza bikerê, peyser gam bidê eştiş û bikerê raybazê bazarî. Herzewbîn hewl danê ke bi topyekûn parlemento ra çekerê, weçînayişeke bîn de vernîgirewtişê temsîlî ya newî yê. Leteyekê operasyonê plansazîya serokîn o. Kamcî raybazî tercîx kenê wa bikerê. Tîya de çîyo muhîm çi bîro kerden o. Gerek Tirkîye de mûxalefeta civakî, çapemenî, civaka sivîl dûştê na derbe de bi cesaret vindero. Çike her gama ke peyser yena eştiş, nêrazîbîyen nêmusnayiş yena maneya dayişê bedelê hona girdî.”
Wazenê îradeyê civakî bişikînê
Ayhan Bîlgen’î vist vîrî ke Tirkîye de civakî şemûgekê krîtîk de yo û hayr ant îxtîmalan ser: “ Krîzê ke polîtîkaya teberî û zerreyê welatî de ciwiyenê îşaretê waştena vurnayişî kenê. Babeda “Destnêdayişî” tenya nêşkeme eve parlementeran bigîrime dest. Tîya de çîyo mihîm şikitişê îradeyê civakî yo. Zewbîn verîya coy kî 10 kesî eştî, prtî girotî la hona bi quwet ameyiş bi. Dûştê na raybazî wayîrvejyayişê civakî hona beno berz. Gerek kes na mesele zey meseleya mahkemekerdişê parlementeran nêvîno. Eke êrişeke vera civakî ya, gerek civak wayrê îradeyê xo bivejyo.”
Bi drameke însanîyetî ra rî bi rî me
Bilgen’î hayr ant konseptê îmya û herbê qilêrîn yê Seray û manîkerdişê paştdayişê şaran ser û va ma eve ‘drameke însanîyetî’ ra rî bi rî yê. Parlementerê HDP aşkere kerd ke nê kerdenî ti şiklî nêşkenê zey polîtîkayanê tîvarî bi name bikerê û wina dewam kerd: “Ti cayê dinya de rîwalo ke kesê ke sûc kerdîyê estê sûkî nêamey rijnayen. Ezehatê sî ser sî (kemer ser kemerî) de nêverdayiş nêbeno. Bi behaneyê ‘xendekî estê’ ‘kesê bi tifingî estê’ nêşkenê kerdenanê xo rewa bikerê, çarekerdiş poştdayen o. Aşma Remezan de yê ke rojawayê Tirkîye de yê kî ganî dirbetinan bipêçnê.”
HDP do rayverîn bikero
Ayhan Bîlgen’î dema ameyin de derheqê gureyînanê xo de zonayişî day û hayr ant herakerdişê paştdayenê şaran û çormeyanê demokratîk ser: “Rîwalo ke hendayî dejî kerdenan het de nêmanê û mexdûrî nîrê tenyaverdayiş ganî bingeyê paştdayiş bîro ronayen. Zey HDP serva ke qewimyayişê ke amey ciwyayen hiqûqa mîyanî û mavên netewî de bîrê mahkeme kerden taqîpkarê ci bê. Derheqê nayî de ma dosye û materyalî kenê hadre. Kişta bîn ra zî serva rayverîna paştdayena civakî û tesîskerdenê azadî û haştî zey HDP hewldayenanê xo keme berz.
ANF/RIHA