Ê çiqas hêriş bikerî zî ma do xover bidî

Hemserekê Meclîsê Kantonê Kobanê Mistefa Eto ke o zî tafînîyayîşê kilaya şorişî de ca girewtêne, wina va: “Ma bi serran o ke hewl danî hetê leşkerî, ekonomî, huqûq û dîplomasî de sîstemê xo awan bikerî. Tirkîyaya ke wazena sîstemê ma çin bikera, reyna kewta têgêrayîşî mîyan. Labelê ê çiqas hêriş bikerî zî ma do xover bidî.”

Şorişê Rojawanî ke mîyanê şero mîyanên yê Sûrîye de sey Rayîro Hîrêyin vejîya aver, 19ê Temmuza 2012î de hetê şarî ra ame îlankerdene. Hêzê şorişî goreyê xeta ke esas girewt, beşdarê şerê menfîetî nêbi. Şorişê Rojawanî bi rayberîya cinîyan de aver şi û bala dinya ant xo ser.

Rojawan de amadekarîyê pîrozkerdişê serrgêra şorişî dewam kenî. Heto bîn de tehdîtê Tirkîya zî herême ser o dewam kenî. DAÎŞo ke bibi belayê Sûrîye û şaranê dinya, emser zorê ci ame berdene.

Hemserekê Meclîsê Kantonê Kobanê Mistefa Eto ke o zî şewa 18ê Temmuza 2012î de tafînîyayîşê kilaya Şorişê Rojawanî de ca girewtêne, qala şorişî kerde. Etoyî va ‘ê rojî seba Rojawanî rojê tarîxî bî’ û wina domna: “Ma şoriş ra ver zî vera rejîmê Baasî de hertim têkoşîn dayêne û o têkoşîn heta dûştêk amebi. Sûrîye de lazimîye bi şorişêk estbî. Rejîm û hêzê sey OSO ke xo muxalîf nîşan dayêne, hewl dayêne ke waştişanê şarî mînîmalîze bikerî. Bi no hewa waştêne Şorişê Sûrîye xeta şarî ra bivejî.”

Ma qerar girewt ke xo bi xo îdare bikerî

Etoyî da zanayene ke ê o wext rayberîya TEV-DEMî de xo rêxistine kerdêne û wina va. “Ma vera hetê rejîm û OSO de rayîrê hîrêyinî tercih kerd. Ma seba ke bibî cewab, kewtî rayîr. Ma waştêne ke heme bawerî û şaran bîyarî têhet. O wext Cerablus, Sirîn, Eyn Îsa û Girê Sipî de OSO estbî. OSO ma tehdît kerdêne ke ma hetê înan de ca bigîrî. Hem rejîm hem zî OSO tercîhê ma ra eciz bî. Ma qerar girewt ke qeza û bajaranê xo bi xo îdare bikerî. Ma heta aye şewe xebatê xo bi hawayo nimitkî kerd. Ma meclîs û rêxistinanê xo awan kerdî. Merkezê ma Mala Gel bi. Ma pêro pîya 15 kesî bîy. Ma zaf biheyecan bî. Heto bîn de sereyê ma de  etirê ‘gelo bi teyarayan bombe bikerî an nê’ û sewbîna xeylê persî zî estbî.”

Aye roje sey roşanî bî

Etoyî qiseykerdişê xo de qala aye şewe kerde û wina va: “Ma şewa 19ê Temmuze bi 15 kesî kombîyayîşêk kerd û ma qerar girewt ke rejîm Kobanê ra bivejî. Ma no het de tayê kesî wezîfedar kerdî. Ma şewe dest bi girewtişê ewleyîya Kobanê kerd û ma rayîrê kewtiş û vejîyayîşê bajarî girewt. Tayê ciwanan zî bi sîlehanê xo yê şexsîyan destek da ma. Ez û Bavê Elo bî. Aye roje sey roşanî bî. Her kesî hewl dayêne ke mendeyanê rejîmî pak bikero. Mi şahidîya vîstêka tarîxî kerde.”

Qala aye roje kerde

Etoyî qiseykerdişê xo de qala vîrardişêkê xo zî kerde û wina va: “Wexto ke ma ewleyîya bajarî girewtêne, kamyonêka ke mîyanê ci de kel-melê keyeyêkî estbi, ameye. Mi dî ke kel-melî aydê keyeyo ke yewîya ewleyîye de ca gêno bi. Vernîya kamyone de cinîyêk û domanêk estbî. Labelê peynîya kamyone de binê kel-melan de kesêk estbi û rîyê ci padaye bi. Wexto ke rîyê xo akerd, mi dî ke keso ke 2010 de ez tepişta û heqaretê mi kerd o yo. Mi pers kerd ‘Ti mi şinasnenî an nê?’ Ey va ‘nê’. Labelê mi da vîrê ci. Ey dîyar kerd ke înan heme çî bi emrê dewlete kerdo. Ez zaf pa menda ke tira heyfê xo bigîra an nê. Labelê mi ti ra va ‘nika ra pey ver merdimanê sîvîlan de çîyanê winasîyan meke’. Ez o wext zaf fikirîyaya, labelê ehlaqê ma destêr nêdayêne ke ma sey înan bikerî.”

Wa şorişê ma şarî rê pîroz bo

Etoyî va ‘nika şorişê ma keweno serra 8.’ û bale ant polîtîkayanê Tirkîya ser. Etoyî qiseykerdişê xo wina qedêna: “Ma serran o ke hewl danî hetê leşkerî, ekonomî, huqûq û dîplomasî de sîstemê xo awan bikerî. Tirkîyaya ke hertim waşte sîstemî çin bikero, nika reyna kewta têgêrayîşî mîyan. Kobanê de çîyê ke DAÎŞî kerdî, yenî zanayene. Çîyê ke Efrîn de ameyî kerdene zî yenî zanayene. Nika zî sînoranê ma ser o sewqîyatanê leşkerîyan kenî. Labelê ê çiqas hêriş bikerî zî ma do xover bidî. Wa şorişê ma şarê ma rê pîroz bo.”