Hemsereke Gultan Kişanake ke verê kombîyayîşê Meclîsî yê aşma êlule yê Şaredarîya Bajarê Girdî ya Amedî de derheqê kayyumê ke şaredarîyanê Sûr û Farqînî rê ameyî tayînkerdiş de qisey kerd. Kişanake da zanayîş ke hem welat hem zî bajar de wezîyetêko xirab esto, Sûr û Farqîn de îradeyê şarî rê mudaxale bîyo û wina va: “Şarê ma şîyo sindoqe ser o û îradeyê xo tayîn kerdo. Xora qanûnê bingehînî de vajîyeno ke ‘îdareyê mehlî bi weçînayîşê demokratîkî yenê karî ser û bi destanê înan yenê îdarekerdiş’. Tayînkerdişê kayyuman îxlalkerdişê qanûnê bingehînî yo û çînkerdişê îradeyê şarî yo. Şaredarî encex bi îradeyê şarî yenê îdarekerdiş. Ma xercê îradeyê şarî îradeyêko bîn qebûl nêkenê.”
‘Peynîya pêynî îradeyê şarî do qezenc bikero’
Kişanake dewamê qiseykerdişê xo de îzah kerd ke, Tirkîya de hetanî nika zaf rey derbeya leşkeri rê teşebus bîyo, vere cû zî muameleyo faşizan û antidemokratîk ameyo kerdiş, la kesê ke teşebusê derbe kerdê peynîya peynî muwafaq nêbîyê û her tim dê mîyanê şermî de bimanê. Kişanak dîyar kerd ke no yew eyb o û eybê demokrasî yo. Îradeyê şarî rê mudaxele kerdiş o. La ma hol zanê ke peynîya pêynî îradeyê şarî serkeweno û qezenc keno.
Qiseykerdişê Kişanake ra dima Verfekê Koma DBP Cîhan Aydinî zî qisey kerd û tayînkerdişê qeyûman sey xespkerdişê îradeyê şarî hesibna.
AMED