Konseya Şaristanî zî no planê Wezaretîya Dorûver û Şaristanawanî ver razînêbîyayîşê xo nîşan da. Konseya Şaristanî veng da Wezaretî ke wa fek muameleyê “Yewhet û navendî” ra verado û cayê daristanî de leyekî ronayî.

Bi hembarê Konseya Şaristanî û Meclisê Ekolojî, vera bira Wezaretîya Dorûver û Şaristanawanî ke meydanê 1/100.000 ser de bedilnayîşê planê îmarî kerda û wazena cayê Daristanê Şaristanî yê Tahîr Elçî bido leşkeriye, çalakîya ronayîşê leyekan viraşt.  

Semedê na çalakî bi seyan kesî Sumerpark de ameyî yewca û bi otobûsan verê xo dayê mintiqayaTalaytepe. Seyan kesê ke mîyan de hembarê Konseya Şaristanî, endamê Meclisê Şaristanî, rayberê Şaredarîya Şaristanê Girdî, cenîya Tahîr Elçî Turkan Elçî zî estbî wexto ke ameyî yewca polîsan nêverda wa şêrê cayê daristanî. 

Polîsan mazeretê xo de vat ‘Ma dekewtişê Talaytepî qedexe kerdo’ Naye ser o hembarê Konseya Şaristanî, Elçî û seyan hemwelatijî kişta stada neweye de dest bi ronayîşê leyekan kerd. 


Şermizar kenî

Sekreterê Pêroyî yê Konseya Şaristanî Cîhan Aydinî ronayîşê leyekan ra dima beyanatêk da. Aydinî îzah kerd ke ê waştênê na çalakî Talaytepe de bivirazî la semedo ke bi hewayêko fiilî no ca ameyo qedexekerdiş nêeşkayê xo biresnî Talaytepe û vat: ‘Ma no muameleyo qedexekar şermizar kenê.”


Ruhê Elçîyî yo 

Dima ra cenîya Tahîr Elçîyî Turkan Elçî qalîkerdişêk kerd û wina vat: “Şaredarîya Şaristanê Girdî ya Amedî nameyê Tahir Elçîyî daya daristan. Na bir ver ez zaf kêfweş bîya. Tahîr Elçî rojêka payizî de ame qetilkerdiş. Nika rojêka wisarî de, roja ke tîje ma rê asîyena de ma nameyê Tahir Elçîyî ser leyekan ronenê. Roje yena nê darî benê pîl û pê fikranê Tahir Elçî benê pîl. Ruhê Tahir Elçî do no daristan de zergun bibo.”


Ravêreyeya huquqî

Dima ra hetkarê Serekê Baroya Amedî Ahmet Ozmen nameyê Konseya Şaristanî ser o beyanat wend. Ozmenî beyanat de eleqa ant ravêreyeya Wezaretîya Dorûver û Şaristanawanî ser û wina vat: “Wezaretîya Dorûver û Şaristanawanî Daristanê Tahîr Elçîyî ra 700 hektar erdî ra 290 hektar erd daya leşkerîye. Îtirazê şaredarî, welatî û SCS ameyê redkerdiş. Semedê betalkerdişê bira doza neqlê Dadgeha Berzî bîya.”

Ozmenî semdo ke Şaredarîya Şaristanê Girdî ya Amedî nameyê daristanî kerda ‘Daristanê Tahîr Elçîyî’ Şaredarî rê spas kerd û wina vat: “Tahir Elçî wexto ke ame qetilkerdiş mîrasê kulturî ser o qisey kerdênî ame qetilkerdiş.” 


Çew nêşkeno şaristan de cîf bigîro

Ozmenî îzeh kerd ke şaristanê Amed dorê şaristanî hetê leşkerîye ra ameyo pêşayîş. Vanê; ma semedê asayîşî wina kenê la no wezîyet ver kes nêeşkeno mîyanê şaristanî de cîf bigêro û wina domna: “Ma yew daristanê şaristanî wazenê û ma wazenê tede boya xo bidî, nefes bigêrî û versîyaya daranê ci de ronişî. La semedo ke ma wina yew çîyo însanî wazenê vernîya ma de planan ronenê. Ma bira Wezaretîya Dorûver û Şaristanawanî raşt nêvînenê û wazenê wa na bir betal biba.”

Ozmenî peynî de veng da Wezaretîya Dorûver û Şaristanvanî ke wa fek muameleyê ‘Yewhet, navendî’ ra verado û ê do  nêverdî daristanê şaristanî de bê daristan bimano.


 AMED