JIYAN AMARGÎ
ANF / ŞIRNEX
“Destpêkê operasyonan ra nata nêzdîyê 40 leşkerî ameyî kiştene. Dişmen merdeyanê xo nêvano û derbeyo ke Herekol de werdo nimineno.”Fermandarê herêma Herekolî Egîd Garzanî derheqê hêrişê dewleta tirkî û zuranê medyaya tirkî de melumatî dayî. Fermandar Garzanî dîyar kerd dişmen vano ‘ma kewtî tîya, ma tîya girewt’ labelê na propoganda ya û wina domna: “Destpêkê operasyonan ra nata nêzdîyê 40 leşkerî ameyî kiştene. Dişmen merdeyanê xo nêvano û derbeyo ke Herekol de werdo nimineno.”
Vera hêrişê dewleta tirkî ke her roje Kurdîstan de zêdyeno xoverdayîşê gerîlayan dewam keno. Fermandarê Herekolî Egîd Garzanî hêrişê dewleta tirkî yê vera Herekolî ser o qisey kerd û melumatê muhîmî pare kerdî.
Garzanî da zanayene ke dewleta tirkî vera xoverdayîşê gerîlayan de tengayî ancena û wina dewam kerd: “Bitaybetî zî psîkolîjîyê leşkeran zaf xirab o. Leşkerî tarîyê şewe de kerra zî bivînî tersê gerîlayan ra bi seyan guleyî nanî pa. Dişmen propaganda keno û vano ke ‘ma kewtî tîya, ma tîya girewt’ la cayê ke vanî ûca de operasyon çin o. Dewleta tirkî sey timî şero taybet dana domnayene. 25ê Temmuze de dişmenî dormeyê Çemê Karê de operasyonêk da destpêkerdene. Heman roje de embazan vera înan de çalakîyêk viraşte û 3 leşkerî ameyî kiştene.”
Garzanî va ‘26ê Temmuze de hêrişê vera Herekolî hîna ame hîrakerdene’ û wina domna: “Dişmenî herêmanê Kulind, Şehîd Sorxwîn û Şehîd Canxortî girewtî binê kontrolî. Dişmen vano ke ‘ma kewtî her cayê Herekolî‘ na zurî ya. No şero taybet o. Sey timî wazenî ke şarî bixapînî. La ê se kenê wa bikerî nêeşkenî raştîyan biniminî. Leşkeran hema destpêkerdişê operasyonî de derbeyê girdî werdî. Çalakîyan de nêzdîyê 40 leşkerî ameyî kiştene. Dişmen merdeyanê xo nêvano û derbeyo ke Herekol de werdo nimineno. Leşkeran paştê xo teknîkî ra girê dayo la ey rixmê naye nêeşkenî vera gerîlayan de şer bikerî. Leşkerî sînor de tengayî ancenî. Girê ke tepiştî nêeşkenî ci ra vejî.”
Dişmen nêeşkeno bikewo Herekolî
Garzanî vist vîrî ke ê 35 serrî yo têkoşînê çekinî danê domnayene û wina va: “Dişmen nêeşkeno bikewo Herekolî. Tena yew- di girî girewtî û ûca de mehsur mendî. Hem erazîya Herekolî ra hem zî çalakîyanê gerîlayan ra ê nêeşkenî bikewî Herekolî. Embazan Girê Şehîd Berxwedanî de çalakîyêk viraşte û dişmenî cade o gir ca verda û rema. Çalakîyanê gerîlayan ver koyanê Kurdîstanî de dişmenî rê rehetîye çin a.”
Herekol do tim bibo goristan
Fermandar Egîd Garzanî qiseykerdişê xo bi nê vatişan qedêna: “Goreyê medyaya tirkî dişmenî Herekol û xeylî cayê Kurdîstanî girewtî. Goreyê zuranê înan gerîla zî zaf tengayî anceno. La gerîla vera na propagandaya zure bi çalakîyan cewab dano. Nika heme koyanê Kurdîstanî de gerîla derbeyanê girdan dano dişmenî ro. Bi operasyonê Herekolî dişmenî reyna dî ke ê nêeşkenî koyanê Kurdîstanî kontrol bikerî. Herekol nê operasyonî de zî înan rê bi goristan. Vera hêrişê dişmenî de gerîlayê azadîye do tim têkoşîn bikerî û Herekol do tim dişmenî rê bibo goristan.”