Endama Konseyê Caardişî yê KJKyî Ayten Dêrsime serrgêra 20. ya 9ê teşrîna verêna 1998î destpêkê Komploya Mîyanneteweyî de va ‘kes nêşêno ma Rayberîya ma ra biqerfno’ û wina dewam kerde: “Ma do têkoşînê xo vera nînan de berz bikerî. Armancê ma azadîya Rayber Apoyî yo.”

9ê teşrîna verêna 1998î destpêkê Komploya Mîyanneteweyî ser ro 21 serrî derbaz bîyî. Komploya ke hedef kerdêne ke Rayberê Şarê Kurdî Abdullah Ocalanî û Tevgerê Azadîya Kurdî çin bikero, bi tepişîyayîşê Ocalanî dewam kerd.

Rayberê Şarê Kurdî Ocalan û kurdî şert û mercanê tewr zehmetinan de bi serran o xover danî û estena xo Rojhelato Mîyanên de domnenî. Nîşaneyê tewr girdî yê nêyî Şorişê Rojawanî yo. Têkoşîno ke bi paradîgmaya Ocalanî hetê kurd û tevgerê azadîye ra yeno nîşan dayene, heta nika komplo veng veto. Ocalanî derheqê komploya 9ê teşrîna verêna 1998î de ‘Komploya Mîyanneteweyî hetê kayê polîtîkî û menfîetê ekonomîke de xeylê îxanet, hîle û zor zî mîyanê xo de hewêneno’ vatbi.

Endama Konseyê Caardişî yê Komalê Cinîyanê Kurdîstanî (KJK) Ayten Dêrsime serrgêra 20. ya Komploya Mîyanneteweyî ser o qisey kerde. Dêrsime dîyar kerde ke komplo nêresa hedefê xo û ewro hewl danî bi tecrîd û sewbîna çîyan têkoşînê Tevgerê Azadîya Kurdan û şarê kurdî tasfîye bikerî.

 

Esaret nêşêno vernîya azadîye de bibo asteng

Dêrsime va ‘beno ke Rayber Apo ameyo tepiştene, labelê hetê ruhî, felsefe û îdeolojîkî de azad o’ û wina domnaye: “Rayber Apoyî felsefeya xo ya azadîye neqlê şarî kerda. Têkoşînê ma her parçeyê Kurdîstanî de dewam keno. Heta nika bi felsefeya Rayber Apoyî xeylê serkewtişî kewtî ma dest. Şorişê Rojawanî zî nînan ra yew o. Tirkîya û hêzê hegemonîkî hewl danî Ocalan teslîm bigîrî. Ma vizêr zî esîrîya Rayber Apoyî qebul nêkerd, ewro zî nêkenî.”

 

Şarî yewîya xo awan kenî

Dêrsime dewamê qiseykerdişê xo de wina va: “Sîstemê Îmrali raşteraşt girêdayeyê NATO û sewbîna dengeyanê dinya yo. Sîstemê Îmrali goreyê menfîetê hêzanê mîyanneteweyîyan awan bîyo. Bi serran o Rayber Apoyî reyde pêvînayîşî nînî kerdene. Dewleta tirkî tîya de ti rolê xo çin o û yena bikar ardene. Eke dewleta tirkî prosesê aştîye baş îdare bikerdêne, ewro na rewşe de nêbîyêne. Hedefê esasî yê Tirkîya û hêzanê hegemonîkan o yo ke komelêko kole awan bikero. Şarî nê qebul nêkenî û bi felsefeya Rayber Apoyî hewl danî yewîya xo awan bikerî.”

 

Rayber Apoyî rîyê înan yê raştî vet raşte

Ayten Dêrsime derheqê qerarê Mehkemeya Heqê Merdiman ya Ewropa (MHME) de va ‘MHME bi qerarê xo ke çend rojî verê dabî, xoserîya xo kerd tehlukeyî mîyan’ û wina dewam kerde: “Rayber Apo bi têkoşînê xo rîyê MHME û CPTyî yê raştî vet raşte. CPT raporê xo yê zîyaretî 2 serrî ra dima aşkere keno. Na bêhuqûqî ya. Tecrîd mîyanê tecrîdî de yo. Bi tecrîdî wazenî şar û tevgerê ma tehdît bikerî. Ma do têkoşînê xo vera nînan de berz bikerî. Armancê ma azadîya Rayber Apoyî yo. MHME serrgêra komploye de îzehet da û no zî tesaduf nîyo. Armancê înan ganîkerdişê komplo yo.”

 

MERKEZÊ XEBERAN

 
 

Çareserîye bi felsefeya Ocalanî bena

 

Hemsereka PJAKî Zîlan Vejîne zî 9ê teşrîna verêne destpêkê komplo ser o qisey kerde. Vejîne va ‘hedefê komploye tena Ocalan nêbi, kurd û nasnameyê kurdan zî ame hedef girewtene’ û wina domnaye: “Waştî seserra 21. de reyna derbe bidî kurdan ro. Komplogêrî hewl danî komploya xo bidomnî û wazenî Rojhelato Mîyanên dîzayn bikerî. Labelê Rayber Apo bi felsefeya xo komploya mîyanneteweyî veng vet. Heme hêzê sosyalîstî wazenî têkoşîno ke hetê Ocalanî ra dîyayo dest pêkerdene, nas bikerî û bidomnî. Heme hêzî ferqê ci de yî ke vera sîstemê kapîtalîstî de tena alternatîf sîstemê Ocalanî yo.”