Serewedarnayîşo ke 15 cayanê cîya-cîyayan yê Başûrê Kurdistanî de vera hukmatî de dest pêkerdbî, roja 6. de dewam keno. Şar 18ê Kanûne de bi waştişê ‘wa hukmat îstîfa bikero’ vejîyayî raşteyan û dest bi çalakîyan kerdî û her ke şono hêrs û reaksîyonê şarî hîra benî.
Heta nika netîceyê hêrişê Hêzê Asayîşî de 7 kesî merdî û bi seyan kesî zî birîndar î. Reyna bi seyan kesî ameyî tepiştiş û tayê kesan ra zî xebere nîna girewtiş. Babete ser o çalakgêrî qisey kerdî û qala waştişê xo kerdî.
Çalakgêran ra Karwan Hesenî va ‘çalakîyan de tena mamostayî nê, her hetê komelî ra kesî beşdar bîyî’ û wina dewam kerd: “Başûrê Kurdistanî de krîzêko gird yê ekonomîke esto. Verê cû tena meaş ameyêne waştiş. Labelê nika newebîyayîş, cereyan, awe, meaş û sewbîna heqî yenî waştiş. No hukmat êdî nêşêno probleman çareser bikero; cok ra wa îstîfa bikero. Polîs û pêşmergeyî vera çeteyanê DAIŞî de şer kerdî. Labelê nika hukmat wazeno meaşanê înan zî bibirno. Cok ra ganî pêşmerge û polîsî zî destek bidî çalakgêran.”
Ala Raufî zî va ‘6 rojî yo ke çalakîya protestokaran domîyeno’ û wina domna: “Şar seba heqanê xo vejîya raşteyan. Nika bi deshezaran ciwanî betal mendî. Tena Helebçe de 10 hezar ciwanê ke unîversîte wendî, betal î. Hukmat çareserîyêk nêvîneno. Êdî bawerîya ma hukmat û Meclîs rê nêmenda. Heta nika ti waştişê ma nêame ca. Herême de krîzêko gird esto. Êdî no sîstem wina nêşono û wa hukmat îstîfa bikero. Ganî paytextê Herêma Kurdistanî de zî çalakîyî bibî û wa şar vernîya Meclîsî de çalakîyan bivirazî.”
HELEBÇE/ROJNEWS
