Çalakîyê grevê vêşanîye dewam kenî. Vizêr grûbêka bîne ke 15 kesan ra pê yena, dest bi rojeyê mergî kerd. Çalakwananê grûba yewine ya rojeyê mergî ra Asli Dogane bi mektûbêkî wina vato: “Êdî bes o, ameyo verê qirike. Eke ma yewbînan temam bikerê ma do miheqeq ser bikewê.”

Vera tecrîdê serê Rayberê Şarê Kurdî Abdullah Ocalanî de çalakîyê ke xeylê hetan de dest pêkerdbî, dewam kenî. Çalakîya grevê vêşanîye ya Leyla Guvene roja 185. de, çalakîya Nasir Yagizî roja 172. de, çalakîya hepsîyan 147. de, çalakîya Îmam Şîş û 14 xoverdayoxanê Strasbourgî roja 146. de dewam kena.

Çalakwanê ke zîndanan de grevê vêşanîye de yî, înan ra 15 hepsîyî 30ê Adare de çalakîya xo açarnabî rojeyê mergî û rojeyê mergî zî roja 12. de dewam keno. Vizêr grûbêka dîyine ke 15 kesan ra pê yena, dest bi rojeyê mergî kerd.

Kesê ke grûba dîyine de ca gênî, nê yî: Yaşar Cînbaş, Muhammed Înal, Dîyadîn Akdemîr, Engîn Kahraman (Zîndanê Kandira), Îbrahîm Dogan, Ahmet Emîn Eren, Mustafa Taştan (Zîndanê Bolu), Senar Efe, Burhan Şik, Faysal Atak, Şafîî Kayhan (Zîndanê Patnosî), Reşat Ozdîl, Zekî Bayhan û Yilmaz Yildiz (Zîndanê Tekîrdagî) û Saît Ozturk (Zîndanê Wanî).

Ma do tecrîdî wedarnê û serbikewê

Çalakwananê grûba yewine yê rojeyê mergî ra Asli Dogana ke Zîndanê Gebze de manena û 13 serrî yo ke zîndan de ya, mektûbêk erşawite û mektûbe de tecrîd û xoverdayîşî ser o hişyarîyê muhîmî kerdî. Dogane mektûbe de bale anta tecrîdî ser û wina vato: “Heta ke tecrîd bibo do qirkerdiş dewam bikero. Eke ma xo ra bawer bikerê û destê ma ra çi yeno bikerê, ma do tecrîdî wedarnê û serbikewê.”

Tecrîd nêşikîyo, qirkerdiş do bidomîyo

Dogane dewamê mektûba xo de wina vato: “Moralê ma berz o û ma biqerar û bibawer ê. Faşîzmê AKP-MHPyî qirkerdiş de biisrar o. Ma zî seba ke qerardar ê ke tecrîd bişiknê, ma çalakîya xo hîna xurt kerde. Sîstemê îşkenceyê Îmrali merkezê qirkerdişî yo. Heme tewirê şerê taybet û psîkolojîkî verê ewja de dima ra vera şarî de yenê şuxulnayene. No qirkerdiş o. Heta ke tecrîdê Îmrali mero şikitene qirkerdişê serê şarê Kurdî zî do dewam bikero.”

Dogane mektûba xo de qala xoverdayîşî kerda û wina vato: “Nika wextê qiseykerdişî nê, wextê xoverdayîşî yo. Tena vatişê raştîyan û rexnekerdiş nêbeno. Xora bi çîyê winasî tecrîd beno giran. Ganî ma hinî nêbê hemparê qirkerdiş û nê sucî. Êdî bes o, ameyo verê qirike. Nê rojanê ke ma tede yê ma eşkenê qederê tarîxê xo dîyar bikerê. Semedê naye zî ganî her kes cayo ke tede yo de destê ci ra çi yeno bikero. Ganî şar û zîndanî yewbînan temam bikerê. Tarîxê ma bi xoverdayîşan pirr î. Dewaya ma ya 40 serran a girde de ma wayîrê tecrubeyî yê. Tena ma xo ra bawer bikerê ke ma eşkenê tecrîdî wedarnî û wa piştîya ma, ma ra pêt bo. Eke ma yewbînan temam bikerê ma do miheqeq ser bikewê.”

 

AMED