NESRÎN HISÊN / DELÎLA AXÎN / ROJNEWS / ŞENGAL
Endama Heyetê Îdareyî yê TAJÊ Neam Elyase derheqê 25ê teşrîna peyêne Vera Şîdetê Cinîyan de Roja Têkoşîn û Piştîdayîşyewbînanî de qisey kerd. Elyase dîyar kerde ke herçiqas ke cinîye hende komel de muhîm a, labelê reyna zî raştê şîdetî yena.
Elyase va ‘Cinîyî hema vaje her roje şîdetî reyde têrî manenî’ û wina domnaye: “Ganî ti cinîye koletîye qebul nêkero. Şeran de zî tewr zaf cinîyî şîdet vînenî. Wextê fermanê Şengalî ser o bi hezaran cinîyî sey esîrî kewtî destê çeteyan yan zî ameyî qetilkerdene. Hîna zî derheqê bi hezaran cinîyan de melumat nêgirîyeno.”
Elyase va ‘komel de cinîye sey namusî yena dîyayene’ û wina va: “Labelê namusê ma erdê ma yo. Eke erdê ma azade nêbo, ma nêşênî azade bicuyî. Eke wextê fermanî de hêzê pawitişê cinîyan bibîyêne, cinîyan şênayêne xo bipawî. Seba ke hêzê pawitişê cinîyan çinêbi, hende ameyî qetilkerdene. Cinîyê êzidîyî fermanî ra dima zî raştê tewir bi tewir şîdetî ameyî. Nika cinîyê êzidî herkes rê benî finak. Çimkî eşkenî xo îdare bikerî û bipawî. Şengal de cinîyî hîna zaf wayîrê Rayber Apoyî vejîyenî. Çimkî felsefeya Rayber Apoyî de bê cinîye cuye nêbena. Ganî cinîyî bêrî têhet û pîya têkoşîn bidî. Reyna ganî cinîyî heyfê dejanê cinîyan bigîrî.”