MÛRAT KUSEYRÎ / ANF / STOCKHOLM
Parlametera swêdije Amîneh Kakabavehe dişmenîya Erdoganî ya vera Kurd û muxalefetî de qisey kerde û melumatê muhîmî dayî. Kakabavehe dîyar kerde ke Erdogan wazeno ke bi hêrişan payra bimano, coka hêrişê Kurdan keno la peynîya ey nizdî bîya, êdî kes ey nêwazeno.
Parlamentere Kakabavehe daye zanayene ke Erdogan bi stratejîya HDP û Kurdan 31ê Adare de binkewt û nê semedî ra bi amancê qesasgirewtişî hêrişê Kurdan keno û wina va: “Erdogan HDP û Kurdan sey mesuldarê vînîkerdişê xo hesibneno. Coka bi heme hêzê xo hêrişê înan keno. Goreyê Erdoganî sebebê heme çîyanê negatîfan Kurd ê. Ganî Ewropa nê qewimîyayîşan bivîno û vera Erdoganî de tewir bigêro.”
Kakabavehe dewamê qiseykerdişê xo de va ‘xora Tirkîya de çew nêeşkeno qala huqûqî bikero’ û wina dewam kerde “Mehkemeyê bêhetî yê ke xoser qerar gênê, çin ê. Heme mehkemeyî bi talîmatê Erdoganî qerar gênê. Eşkera yo ke bi talîmatê Erdoganî Selahattîn Demîrtaş ame tepiştene. Rixmo ke mehkeme qerarê serbestveradayîşî da, Erdogan va ‘Ma nêeşkenê înan veradê’ eşkera talîmat da huqûqî. Tena nê nimûneyî ganî dinya biwirznaynê payan ser.”
Seba ke peynîya ci ameya hêrişê Kurdan keno
Kakabavehe bale ante qayûmê ke hetê îqtîdarî ra ameyî tayînkerdene ser û wina qedênaye: “AKP wazeno ke Kurdan bitersno û peyser game bido eştene. Çar leteyê Kurdistanî de Kurdî vera zaliman de milê xo çewt nêkerd. Hukmatê Tirkî nika zî hêrişê Rojawan û Başûrê Kurdistanî keno. Pere û silehê Kurdan tay ê la bawerî û felsefeya înan esta. Serkewtişê înan ê Rojawanî heme dinya dî. Xora Rûsya û Amerîka zî vera tehdît û hêrişanê Tirkîya tewirêko eşkera nêgênê. Erdogan naye ra zî piştî gêno. La Erdogano ke Kurdan rê dişmenîye keno se keno wa bikero peynîya ci bîya nizdî. Her kes ey ra eciz bîyo.”