Zeynep Altıok vat ke na dewlete her tim qetikaran pawita û wina vat: “Hepisxaneyê Tirkîyaye de nika bi seyan hepsê nêweş estî û rewşa înan zî giran a la qetilê Sêwasî efûkerdiş rewşêka bi şik û manidar a”.

HABÎBE EREN / JINNEWS/ENQERE

Cezaya qetilê Sêwasî amebî birnayiş û dosyaya tay qetil zî vîyartişo dem ser o kewt bî. Doza Sêwasî de Murat Karataş, Eren Ceylan û Murat Sonkur nika fîrarî yê, cezaya muebbetî reyde yenî daraznayiş û dariznayişê înan hema zî Dadgeha Giran a Enqereyî de domyeno. Serekkomar Erdoganî qetilê Sêwasî Ahmet Turan Kiliç efû kerd û Turanî zî serbest mend. Şaîr Metîn Altiok zî Qirkerdişê Sêwasî de cuya xo dabî û babete ser o kênaya Metîn Altiokî, Zeynep Altiok qise kerd.

Sucê merdimîye nêeşkenî efû bikê

Kênaya Metîn Altiokî, Zeynep Altiok bertek nîşanê efûkerdişê Serekkomar Erdoganî yê qetilê Sêwasî  Ahmet Turan Kiliçî û wina vat: “26 serrî ke doza Qirkerdişê Sêwasî de edeletî rê nêresayî, hetta qerardayişê bê huquqî ser o zî sebrî înan ezmun kerdê. Ma no demî aşkera kerd ke wa sucê merdimîye de vîyartişo dem nîro şuxilnayiş. Seba ke Mekaqanûne de zî ca bigo ma sero piro da la ma çik vîra kerdî bivajî ke sucê merdimîye qapsamê efû Serekkomarî de nêbo.”

Serekkomar Qirkerdişê Sêwasî ra kêfweş o

Zeynep Altiok dîyar kerd ke sûcê merdimîye bi tesilî nimîteyo dewlete, vîyartişo dem û efû ra muaf bêro tepiştiş û wina domna: “Ma vera na rewşe de şaş nêmend, Serekkomar verin ra qetilê Sêwasî zey maxdûr vînaynî. Qirkerdişê Sêwasî de merdimî bi ganî ameyî veşnayiş û seba ke qapsamê vîyartişo dem ra ame girewtiş, Serekkomar zaf bi kêfweş bî, peynî zî xo rê qetilê Sêwasî pawitî. Xo rê îqtîdarî ra nêzd çapemenî efûbîyayişê nê qetilan ser o dest pê kampanya kerdbî. Tewro peynî heqê no kesî Tiba Edlî raporo zexm da, çi balo ke heqê nê doktoran de cipersayiş akerdê. No efû Serekkomarî bi sîstematîk ame kerdiş. No zî nîno qebulkerdiş.”

Seba yew kesî merhamet

Altiok aşkera kerd ke doza Qirkerdişê Sêwasî de her tim rewşa bê huquqî ame cuyayiş û tewro peynî zî qetil efû kerdê û wina dewam kerd: “Ma hetanî peynî do xoverdayişê xo bidomnê, her nêweş nîno efûkerdiş. Ganî normê huquqî bêro şuxilnayiş, eke dewlete bi huquq bibo xo rê mekanîzmayê edeletî bi weş aver şîno. Mîsal rewşa weşî ya Selahattîn Demîrtaşî doktorî zî vanî weş nîyo û hetta bi seyan hepsê nêweş estê la Serekkomar Erdogan tena yew kesî û o zî qetil o mekanîzmayê efû şuxilneno. Na rewşe de şaşî û bê edeletî esta.”