Serekê Pêroyî yê Partîya Azadî û Sosyalîste (OSP) Sînan Çîftyurekî derheqê Kongreya Neteweyî ya Kurde û averşîyayîşê peyên de qisey kerd û vînayîşê xo ard ziwan. 

Çîftyurekî va ‘nika kurdî prosesêko giran ra derbaz benî’ û qiseykerdişê xo wina domna: “Senî ke dagîrkeran Kurdistan kerdbî çar parçe, ewro zî wazenî mezgê kurdan parçe bikerî. Mezgê kurdan parçe nêbeno û ganî rêxistinê kurdan bibî yewe û firsendê parçekerdişî nêdî yê ke wazenî mezgê kurdan parçe bikerî.”

Çareserî benî

Çîftyurekî dewamê qiseykerdişê xo de bale ant yewîye û wina va: “Eke hetê aqilî de yewîye bêro viraştiş, ti problem orte de nêmaneno. Bi serran o şarê kurd bi her hawayî têkoşînê azadî dano meşnayîş û heta nika xeylê bedelî zî ameyî dayîş. Nê bedelî do bibî sedemê azadîya şarê kurdî. Nika wext wextê yewîyeyêka xurt a. Eke partî û rêxistinê kurdan bibî yewe o wext ma do welatê xo azade bikerî. Cok ra ganî ma aqilêko ortax awan bikerî.” 

Gamê ortaxî

Çîftyurekî qiseykerdişê xo de va ‘seba yewîyeyêka xurt ganî çar parçeyê Kurdistanî de gamê ortaxî bêrî eştiş’ û qiseykerdişê xo rê wina dewam kerd: “Nê 2 serrî yo ke vera şarê kurdî de şerêko taybet ameyêne meşnayîş. Labelê nê prosesê şerî de şarê kurd yewîya xo nîşanê heme şaran da. Cok ra ganî êdî sîyaset, rêxistin û partîyê kurdan bibî yewe û no firsendêko vejîyayo orte ra feyde bivînî. Eke yewîya kurdan bivirazîyo, o wext do bêro dîyayîş ke na yewîye do seba heme şaran bibo sedemê aramî.”

Roja yewîye ya

Çîftyurekî qiseykerdişê xo bi no hawa qedêna: “Eke Kongreya Neteweyî her çar parçeyê Kurdistanî de bêra viraştiş û partî û rêxistinê ma bêrî têhet, o wext do demokrasî zî xo reyde bîyaro. Êdî hêzê sîyasetê kurd hetê heme cîhanî ra yeno qebulkerdiş û yeno şinasnayîş. Ganî ma mîyanê xo de têkilîya xo yewbînan reyde xurt bikerî. Kongreya Neteweyî do seba ameyoxa sîyasetê kurd bibo gamêka muhîme. Ez yewna rey vana ke firsendê ke nika kewtî destê ma, ganî ma seba menfîetê xo bixebetnî. Ewro roje roja yewîya Kurdistanî ya. Ma do destê xo bidî yewbînan û seba ameyoxa şarê xo ma do qerarê azadî bidî.”


FERÎT DERE  / DÎHABER / ANQARA