Eke hêriş bibo ma do xover bidî

Hemserekê PYDyî Şahoz Hesenî vera hêriş û dagîrkerîya dewleta Tirkî de reaksîyon nîşan da û wina va: “Tirkîya wazena ke bi kerrayêk di milçîkan bikişo. Sûrîye parçe bikero û vera Kurdan de qirkerdişanê xo bidomno. Ma dîyalog esas gênê, la eke dewleta Tirkî hêrişê ma bikero ma do xoverdayîşêkê xurtî bidê nîşandayene.”

Hemserekê PYDyî Şahoz Hesenî derheqê hêriş û dagîrkerîya dewleta Tirkî yê vera Rojawanê Kurdîstanî de qisey kerd. Hesenî bale ante tehdîdan û sewqîyatê sinorî yê dewleta Tirkî yê vera Vakur û Rojhelatê Sûrîye ser û da zanayene ke vera hêrişê dagîrkerî de do xoverdayîşê înan gird bo.

Hesenî vist vîrî ke dimayo ke QSDyî çeteyanê DAÎŞî rê da vînîkerdene dewleta Tirkî seba ke hûzir û  asayîşê herême birijno, çi ke dest ra yeno kena û wina va: “Têkîlîya dewleta Tirkî û DAÎŞî xora hetê her kesî ra yena zaneyene. Tewr peynî de dagîrkerîya Efrînî de zî no çete ame şuxulnayene.”

Ganî hêzê mîyanneteweyîyî destûr nêdî tehdîdan

Hesenî qiseykerdişê xo de qala amancanê Tirkîya kerde û wina va: “Dewleta Tirkî roja verêne ya krîzê Sûrîye ra wazena ke Sûrîye dagîr bikero. Nika zî wazenê cayê ke destê çeteyan ra girîyayî, reyna bigîrî. Dewleta Tirkî vera Kurdan de polîtîkaya qirkerdişî dana domnayene.  Çîyê ke bi destê DAÎŞ û El Nûsra nêeşkayê bikerî, ewro wazenî bi xo bikerî. Sîyasetê dewleta Tirkî leymin û bitehluke yo. Vakur û Rojhelatê Sûrîye ra qet guleyêk Tirîya ser ra nêbîyo la heme hêrişê ke ma rê bîyî, sinorê Tirkîya ra bîyî. No semedê herême tehluke yo û ganî bêro vindarnayene. Hêzê mîyannteweyîyî ganî tehdîdanê Tirkîya yê vera Sûrîye de bivînê û destûr nêdê înan.”

Wazenî heme Kurdan tîya ra vejî

Hesenî dewamê qiseykerdişê xo de qala hedefanê Tirkîya û îxtîmalê hêrişan kerd û bale ant vera hêrişan de xoverdayîşê înan ser. Hesenî wina dewam kerd: “Tirkîya wazena ke bi kerrayêk di milçîkan bikişo. Sûrîye parçe bikero û vera Kurdan de qirkerdişanê xo bidomno. Çeteyanê xo keyeyanê Kurdan de bica kenê û wazenê ke heme Kurdan tîya ra vejî. Ma dîyalog esas gênê, la eke dewleta Tirkî hêrişê ma bikero ma do xoverdayîşêkê xurtî bidê nîşandayene.”

Bi hêrişan problemêk zî çareser nêbeno

Hesenî dewamê qiseykerdişê xo de da zanayene ke qet şik çin o ke dewleta Tirkî wazena ke hêrişê Vakur û Rojhelatê Sûrîye bikero û wina domna: “Eke wina yew waştişê înan nêbîyêne, înan hende leşker, sîleho giran û çeteyî sinor de bica nêkerdêne. Ganî her kes bizano ke hêrişo winayên tena zirar nêdano herême, Tirkîya zî do ci ra zirar bivîno. Reyna do polîtîkaya Amerîka û Rûsya rê zî tesîr bikero. Weçînitişo peyên de Tirkîya Erdogan ra va ke ma na polîtîka qebûl nêkenê. Bi zîhnîyetê faşîstî hêrişkerdişê Vakur û Rojhelatê Sûrîye qet problemêk çareser nêbeno. Heqê Erdogan û hukmatê ci çin o ke şer vejê.”