Avûkatanê Rayberê Şarê Kurdî Abdullah Ocalanî derheqê pêvînayîşê peyênî ke muwekkîlê xo reyde kerdî de da zanayene ke Ocalanî înan ra wina vato: “Eke Mezopotamya de Kurdan çin bikerî, o wext Anatolîya de derheqê Tirktîtîye de zî çîyêk nêmaneno. Estene û averşîyayîşê Kurdan, yeno manaya averşîyayîşê Tirkan zî. Ganî herkes nêyî fam bikero.”

SADÎYE ESER / MA / STENBOL

Avûkatê Buroyê Asrinî 12ê Hezîrane de şîyî Îmrali û muwekkîlê xo Rayberê Şarê Kurdî Abdullah Ocalanî de pêvînayîşêk viraştbî. Avûkatan derheqê muhtewaya pêvînayîşî de melûmat pare kerd. Ocalanî pêvînayîş de nimuneya gêrayîşê heqîqete yê Hallaci Mansûrî dayo û wina vato: “Tarîx de zî aseno ke Tirk bê Kurdî, Kurd zî bê Tirkî nêşêno estena xo bipawo. Eke Mezopotamya de Kurdî bêrî çinkerdene, o wext Anatolîya de Tirkî zî nêmanenî.”

Avûkatan derheqê weşîya Ocalanî de da zanayene qaso ke înan dîyo Ocalan xo ser o bi û baş bi û va ‘hetta çend babetan bi huyayîş vatêne’.  Avûkatan dîyar kerd ke ey hîrê pêvînayîşanê verênan de rêzo ke çalakgêranê grevê vêşanîye û rojeyê mergî rê nîşan dayêne, ser o vindeto. Ocalanî vato ‘Na çalakîye hem fedakarîya înan û hem zî kêmanîyêkê înan zî nîşan dana. Çalakgêrî eşkenî bimirî, labelê nêzanî bidî cuyayene. Ma vera mergan de cuye pawenî. Sîyasetê ma sîyasetê dayîşê cuyayîşî yo.”

Ocalanî derheqê gêrayîşê heqîqete yê Hallaci Mansûrî de wina vato: “Mergêk sernî ameyo sereyê Hallaci ser. Labelê reyna zî gêrayîşê heqîqete ra fek veranêdayo. Mi ra zafer kam heqîqete gêreno. Zafaneyê çalakgêran 20-30 serrî zîndan de mendî, labelê hîna zî sîyasetê mergî domnenî. Ez 21 serrî yo tîya de ya, hem hewl dana bicuya û hem zî şima zî dana cuyayene. Labelê ganî şima zî xo bidî cuyayene.”

Teber ra mepawê, bi xo bikerê

Ocalanî pevînayîş de herinda çareserîya ke teber ra yena pawitene, xo rêxistinkerdene pêşnîyaz kerdo û wina vato: “Bitaybetî warê sîvîlî de gerek çareserîyê sîvîlî bêrî averberdene. Herinda ke teber ra bipawî, ti bi xo xo rêxistine bikerî, aver bîşêrî û awan bikerî. HDP, şar, komelî û dezgeyê bînî mîyanê wareyê sîvîlî de yî.”

Avûkatan dîyar kerd ke Ocalan seba Vakurê Sûrîye de çareserî bêro afernayene, vato ‘ewja de ganî metodê xoserî, federasyon û sewbîna bêrî averberdene û vato ‘Rojawan eşkeno sey girava azadîye seba heme merdimîye bêro vînayene’. Goreyê vatişê avûkatan Ocalanî no het de vato ‘polîtîkayê zere û teberî yê Tirkîya û Sûrîye girêdayeyê yewbînan î’.

Bi hezaran Bekoyî estî

Avûkatan ard vîr ke Ocalanî hîrê pêvînayîşan de zî destana Mem û Zîne ra tayê nimuneyî dayî û wina vato: “Mem û Zîn eşqêko bê îmkan o. Memî çîyê bêîmkanî wazeno. Ewja de yew Beko esto, labelê ewro bi hezaran Bekoyî estî. Hetta ewro hewl dîyeno zafaneyê komelî bikerî Beko. Ehmedê Xanîyî sey fîlozafêkê wexto ke seba destenêk Cizîr weçîna, o wext zana ke kulturê Cizîrî seba destanêka winasî munasîb o. Ganî ewro zî o ruh Cizîr de bibo.”