Eke rojnamegerî azad nêbî, ti kes azad nîyo

3ê Gulane Roja Azadîya Çapemenî ya û her serre na roje hetê rojnamegeran ra yena pîrozkerdene. Babete ser o temsîlkarê rêxistinanê rojnamegeran qisey kerdî û qala rewşa çapemenîya Tirkîya kerdî.

Verfekê Înîsîyatîfê Rojnamegeranê Azadan (OGÎ) Hakki Boltanî na roje pîroz kerd. Boltanî va ‘roja ke Miletê Yewbîyayeyî na roje îlan kerda ra nata, tayê holdîngî beşdarê çapemenîye bîyî û wina domna: “Cok ra êdî bêhetîya çapemenî yena munaqeşekerdene. Hûmara dezgeyanê çapemenîye zêde bîyî, labelê muhtewaya ci bîya tek tîp. Eke rojnamegerî azad nêbî, ti kes azad nîyo.”

Boltanî va ‘îqtîdarê Erdogan û AKPyî nika 166 rojnamegeran zîndanan de tepişeno’ û wina dewam kerd: “Rojnamegero muxalîf ke ci rê doze nêabîya, nêmendo. Tirkîya de çapemenî bîya vengê wayîrê xo û êdî ti kes goş nêdano înan. Ê bi xo zî îtîraf kenî ke kes temaşe nêkeno.”

Eke şima kurd bê, 2 reyî teda vînenî

Temsîlkarê Sendîkaya Rojnamegeranê Tirkîya (TGS) yê Amedî Mahmut Oralî zî qala zextê ke rojnamegeran ser o estî kerd û wina va: “Tirkîya azadîya çapemenîye de rêza 157. de ya. Şertê rojnamegerî yê warî bîyo zehmetin. Do îqtîdarê AKP hertim bi zextanê xo bêro yadkerdene. Ganî rêxistinê komelanê sîvîlan seba demokratîkbîyayîşê welatî bixebetyî. Tirkîya de bedelê rojnamegerîya muxalîfî esta. Merdim yeno tepiştene, kar ra erzîyeno û sewbîna. Eke şima kurd û muxalîf bî, şima 2 reyî raştê tedayan yenî.”