SERKAN DEMÎREL / ANF / ERÎWAN
Cuya Nubar Ozanyanî (Orhan Bakirciyan) yêtîmxaneyanê Ermenistanî de dest pêkerd û ewja ra ver bi şerê azadîya şaran dewam kerde. Fermandarê TKP/MLyî Ozanyano ke eslê xo de armenî yo, 14ê tebaxa 2017î de Rojawan de şehîd kewt. Kesê sey Armenak Bakiryan, Nubar Yalim, Hayrabet Honca, Manuel Demîr, Îmam Boztaş û Hrant Dînk zî eynî yêtîmxane ra derbaz bîyî.
Ozanyanî pêroyî heyatê xo seba azadîya şaran feda kerdo. Mabênê serranê 1988 û 1990î de Filistîn de, mabênê serranê 1991 û 1994î de Karabag de, dima ra Başûrê Kurdistan û Rojawan de mend û ewja de resa şehadet. Zafaneyê ma tena hetê Fermandar Nubarî yê leşkerî zanenî, helbuk Erîvan de cinîye û lajêkî ci zî esto. Cinîya ci Nazîk Tulakyane û lajê ci Hacîk Margaryane derheqê Fermandar Nubarî de qisey kerdî û hîsê xo ardî ziwan.
Cinî û lajê Nubar Ozanyanî keyeyêko ke wextê Sovyetan ra mendo de manenî. Ma senî ke dekewtî zere, ma dawetê odeyê xebate ya Nubarî bîyî. Ode de bi seyan kitabê ke derheqê sere de Têkoşînê Azadîya Kurd û hereketê şorişî yê Tirkîya û tevgerê şorişî yê cîhanî de nusîyayî, estbî.Azadî ano vîra merdimî
Cinîya Nubarî Nazîk Talukyane qiseykerdişê xo de qala şexsîyetê Nubarî kerde û wina va: “Ez vana qey merdim nêşeno sey Nubarî merdimêkî bivîno. Nubar qet zirar nêda ti kesî. Tena waştêne ke herkes bi hawayo azad û seyyewbînan bicuyo. O hertim hetê şaranê bindestan de ca girewtêne. Cuya xo de tim seba rindîye şer kerd û o hertim seba şaranê bindestan têkoşîn da. Wexto ke tîya de bî, seba her keso ke azadîye ser o bimerdêne, dejayêne û înan rê bermayêne. Eke mezelê ci tîya de bibîyêne, ez do bişîyêne zîyaretîya ci, labelê îmkan çinêbî ke ma mezelê ci biardêne tîya. Labelê ez bi hawayo baş zana ke cayêko mezelê ci tede yo, ewja de bi hezaran kesî ci ra hes kenî. Ez tena seba çîyêk xemgîn bena; Nubar dinyaya ke xeyal kerdêne, aye dinya nêdî û şî. O do tim zerrîya mi de bibo.”Mi ra zaf hes kerdêne
Xurtê Nubar Ozanyanî Haçîk Margaryanî dewamê qiseykerdişê xo de wina va: “Nubarî qet mi reyde sîyaset qisey nêkerdêne û tim qala dinyaya ke xeyalê ci de estbî, kerdêne. Sey pîyê mi merdimêk na dinya de nîno dîyayîş. Seba her şarî Nubarêkî lazim o. O dinyayêka rinde waştêne, labelê merdimî hîna fam nêkerdî. O waştêne ke herkes bi hawayo azad û seyyewbînan bicuyo. Vera her tewir faşîzmî de vindetêne û cuya kolektîfe ra zaf hes kerdêne, heme çîyê xo pare kerdêne. Wexto ke keye de bî, werd viraştêne û hertim waştêne ke ma pêreyde bibî. Nubar tena pîyê mi nê, eynî wext de mamostayê mi zî bî. Ez her gama xo de ey xo rê finak gêna. Vatişê pîyê mi zaf zor o, ez bi vatişî nêşena ci terîf bikera û xusûsîyetê ci bi vatişî reyde nêqedîyenî. Seba ci şorişê şaranê bindestan zaf muhîm bî.”