MEHME ŞAH ORUÇ / MA / AMED
Şêx Seîd û 47 embazê ci 29ê Hezîrana 1925î de Rasteyê Berê Koyî yê Amedî de ameyî îdam kerdene û ewro serrgêra 93. ya îdambîyayîşan o. Keyeyê Şêx Seîd û embazanê ci seba ke heqîqete bivejîyo orte û wa dewlete û hêzê mîyanneteweyî ozrê xo biwazî waştî wa heyetêk bêro awan kerdene.
Babete ser o torinê Şêx Seîdî Mehmet Kasim Firatî qisey kerd. Firatî va ‘herçiqas ke 93 serrî derbaz bîyî, labelê xoverdayîşê Şêx Seîd û embazanê ci dewam keno’ û wina domna: “Zîhnîyetê Îttîhat û Terakkî hîna zî dewam keno. Labelê kurdî zî bi ruhê xoverdayîşî têkoşînê xo domnenî. Felsefeya komare de îmha û înkar estî û ewro zî dewam kenî.”
Firatî dewamê qiseykerdişê xo de wina va: “Kurdî şaranê tewr kehenan yê Rojhelatê Mîyanênî ra yî. Kurdan heta nika xeylê şarî erdanê xo de kerdî meyman. Labelê kurdan ser o îmha û înkar ameyî ferzkerdiş. Ganî mîyanê kurdan de îttîfaq bêro awan kerdene û kurdê çar parçeyê Kurdistanî bibî yewe.”
Şar mezg, qelb û hîsanê xo de wayîr vejîyeno
Firatî qiseykerdişê xo de qala xoverdayîşê Şêx Seîdî kerd û wina qedêna: “Herkes cayê mezelê Şêx Seîd û embazanê ci zano. Labelê dewlete bi hawayo fermî cayê ci nêvana. Ma Tirkîya de muracatê heme cayan kerd. Eke xoverdayîşê înan nebîyêne, do îdamî bidomîyayênê. Ma ferqê nêyî de yî.”