Teqayîşê Beşîktaşî ra dima Wezîrê Karê Zerrî yê Tirkîye Suleyman Soylu fermanê “heyfgirotişî” da. Na fermanî ra dima 600 ra vêşî HDPyijî û Kurdî amey binçim girewtiş. Vejya teber ke kesê ke Stenbol de amey binçim girewtiş raştê îşkenceyanê giran ameyê. Pawitoxî hadreyîn kenê ke îşkenceyê ke bin çiman de HDPyijan rê kenê, berê Neteweyê Yewbîyayeyî û Komîteyê Vernîgirotişê Îşkence yê Konseya Awrûpa (CPT).
Pawitoxan îşkenceyo ke rayveranê HDPyijan rê ame kerdiş bi damûstayîneke çapemenî Komeleya Heqê Merdiman ê Stenbol de aşkere kerdî. ÇHD, EHB , HDP û rêxistinanê dezgehanê sivîl zî desteg day. Hemverfekê OHP yê Stenbolî pawitox Sînan Zîncîr qisey kerd û vist vîrî ke qereqolan de bin çiman de îşkenceyê giran ameyo kerdiş.
Endama ÇHD pawitox Ebrû Tîmtîk zî vist vîrî ke Midûrîyeta Emnîyetî yê Stenbolî de sûc ameyo kerdiş. Tîmtîk aşkere kerd ke iyê dê serpirodayişê dezgehanê eleqedar yê mavên neteweyî bikerê û va, la bi nayî mesele hal nêbena, raya çarekerdişî dûştê faşîzmî de xoverdayiş o.
Nêşkena ser payan de vindero
Endama EHB pawitox Gulhan Kaya zî qala pêdiyayişê xo yê bi muwekîla xoFîlîz Çolak kerd û ard ziwan ke bin çiman de îşkenceyê Çolak ameyo kerdiş. Kaya da zonayen ke nêweşxaneyê Hasekî de zî polîsan îşkenceyê ci kerdo û nê detayan da: “Doxtoreke wazeno mudaxale bikero, la polîsî vernîya doxtorî gênê. TEMî de danê piro, ci kenê viran û serê ci geyrenê. Geyrayişî ra dima polîsan bi lingan dayo sîne û cayê genîtal ro. Winî kerdîye ke nêşa ser payan de vindero. Her tim bi tecawiz tehdîd kerdê. Rîwalo ke waşto bi pawitoxê xo ra pêdiyayin virazo raştê îşkence ameyê. Seba ke îtirafkarî bikerê zextê ci kerdê. Polîsan ci rê vato eke ser tayî kesan îfade bidê, dê înan serbest veradê. Serê di seatan finî (reynî) muwekîla mi berdîye cayekê û dayê piro. Endamê Meclîsa Partî yê HDP Esen Guldemîr zî da zonayen ke bin çiman de îşkence rayveberanê înan ra ameyo kerdiş û derheqê weşîya înan de bi endîşe yê.
Doxtorî rapora ‘rewşê ci rind o’ da
Rayvebera ÎHD pawitox Gulseren Yolerî zî hayr ant ser îşkenceyê ke Girotxaneyê Şirnex de yenê kerdiş ser û wina va, “Tepişteyekê genc rîwalê îşkence destê ci felc bîyo. Rexmo ke ser çimanê ci de rêçê îşkence estê zî doxtorî rapora ‘durumê ci rind o’ dayo. No pêdiyayişî ra dima tepişteyê bi nameyê Beytûllah Akîlî seba protestokerdişê îşkence întixar kerdîyo.
Qiseyan ra dima pawitoxê Buroya Hiqûqî yê Se serrî Îbrahîm Bîlmezî damûstayîna wertex wend û veng da raya pêroyî ya demokratîk, aktîvîstanê heqê mordeman ke vera îşkence û kerdenanê xirab de tekoşîn bikerê.
Pawitox Zîncîrî zî da zonayen ke derheqê îdîayanê îşkence de ê dê serpirodayişê Serdozgerîya Komarê yê Stenbolî û dezgehanê zey Neteweyê Yewbîyayeyî û CPT bikerê.
ANF / STENBOL