Emser Serrgêra 37. ya Derbeya Leşkerî ya 12ê Êlula 1980î yo. Eynî wext de Serrgêra 16. ya ke Amerîka de 2 kuleyê raştê hêrişî ameybî, ya.
Babete ser o Endamê Komîteya Merkezî ya PKKyî Cemal Şerîkî qisey kerd û derheqê derbeya leşkerî û hêrişo ke vera kuleyê Amerîka de vînayîşê xo ard ziwan.
Endamê Komîteya Merkezî ya PKKyî Şerîkî destpêkê qiseykerdişê xo de qala serranê 2000î kerd û wina va: “Hêzê hegemonîkî serra 2000î ra ver tim propagandaya ‘2000 ra pey do demokrasî bêro û heme ca bibo gulistan. Labelê dima ra Pakistan de derbe virazîya û ame dîyayîş ke do wina nêbo. O wext Sosyalîzmo Reel têk şîbî û hêzo hegemonîk heme plan û projeyan goreyê xo viraştêne. Labelê herçiqas ke wina bî zî heme çî goreyê waştişê hêzanê hegemonîkan nêbîyêne. Çimkî bitaybetî Rojhelato Mîyanên de hêzê herême yê sey Îran, Iraq û Tirkîya vejîyayênê orte. Cok ra Amerîkaye nêşînayêne bi hawayo asan nîzamê xo ser dinya de bido ferzkerdiş. Afganistan û Iraq de pêrodoyîşî dest pêkerdbî. Tîya de îxtîmalê serewedaritişê hêzanê şorişgeran zî estbî. Xora Komploya ke vera Rayber Apoyî de ameye viraştiş zî girêdayeyê nêyî bî.”
Şerîkî dewamê qiseykerdişê xo de dîyar kerd ke derbe ra dima Kurdistan de rejîmê şerê taybetî awan bî û wina dewam kerd: “Dima ra goreyê nê rejîmî qanûnî ameyî vetiş. Qanûnê qoricîtî, îtîrafkarî û sewbîna o wext ameyî vetiş. Dima ra polîtîkayê bi vêşanî terbîyekerdişî erzîyayî dewre. Labelê têkoşîno ke aver şî, nê rejîmî şerê taybetî veng vet. Bitaybetî serewedaritişê ke serrê 1992î de bîyî zî nîşaneyê ci bî. Rejîmê şerê taybetî ke nêşînayêne gerîla, bajar de zî vera têkoşînê şarî de bêçare mend. Dima ra Turgut Ozalî Rayberî rê mesaj erşawit û Rayberî zî adirbest îlan kerd. Badê ke Ozal ame tasfîyekerdiş, Gureş, Çîllere, Agar û Demîrel vejîyayî sehne. Şero taybet bi hawayo topyekun dewam kerd û heta vera Rayberî de viraştişê suîqastî şî. Labelê netîce de reyna zî ê tasfîye bîyî.”AKP partîya dewamê prosesê 12ê Êlule ya
Şerîkî da zanayîş ke ‘derbeya 28ê Sibate raştîya xo de amadekara ewroyî ya’ û wina va: “Eke Erdogan û ekîbê ci weçînayîşê 2002 de bîyî partîya yewin, no saya şert û mercê ke 28ê Sibate de ameyî amadekerdiş î. Hetêk ra xo rê partîyêka sîyasî awan kerd û heto bîn ra zî kesê ke fikranê cîyayan de yî girewt hetê xo. Reyna Erdoganî vatişanê şarî seba xo sey malzeme xebetna. Her çiqas ke AKP o wext nameyêko newe bibo zî, partîya dewamê prosesê 12ê Êlule ya. Erdogan bi derbeyêk ame amadekerdiş û derbeyêka bîne ame îqtîdar. Xora îqtîdarbîyayîş ra dima estena xo bi derbeyan domna. Bi no hawa heta 2011î ame. 2011 de Erdogan dest bi Fetullah Gulenî reyde şerkerdişî kerd.”
ANF/BEHDÎNAN