Vera hêrişê dagîrkerîye yê artêşa Tirk û çeteyanê ci de xoverdayîşê Vakur û Rojhelatê Sûrîye yê destanî dewam keno û derbê girdî dîyenî piro. Endamê Konseyê Caardişî yê KCKyî Sabrî Okî va ‘Erdogan faşîstê na seserre yo’ û wina dewam kerd: “Îdeolojîyê Erdoganî îdeolojîyê DAÎŞî yo. Emrê Erdoganî bi aşman sînordar o.”
Artêşa Tirkî 9ê Teşrîna verêne ra nata yo ke bi teyara, tanq, top û çeteyanê xo hêrişê Vakur û Rojhelatê Sûrîye kena û hewl dana Vakur û Rojhelatê Sûrîye dagîr bikera. Vera hêrişê dagîrkerîye de xoverdayîşê Hêzê Sûrîyeya Demokratîke (QSD) yê tarîxî dewam keno.
Artêşa Tirkî heta nika nêşênayo xoverdayîşê QSDyî derbaz bikero, cok ra bi teyara, tanq û obusan herême bombarduman kena û sivîlan hedef gêna. Netîceyê bombardumanan de heta nika bi desan sivîlî ameyî qetilkerdene û xeylê sivîlî zî birîndar bîyî.
Şerwananê QSDyî zî bi desan çalakîyê cîya cîyayî viraştî û bi seyan dagîrkerî kiştî. Çarçewaya xoverdayîşî de dewa Wesîta ya Girê Spî de konvoyêka artêşa Tirk û çeteyan hetê şerwananê QSDyî ra ameye hedefgirewtene. Netîceyê çalakîye de dagîrkerêk ame kiştene û 5 kesî zî birînar bîyî. Dewa Celbê ya Girê Spî ameye rizgarkerdene. Dewa Kendalî ya Girê Spî û dewa Yarqo de 3 wesayîtê zirxinî ameyî îmhakerdene.
Planê dagîrkeran veng vejîya
Dagîrkerî seba ke têkilîya Til Temir û Serêkanîyê biqerfnî, hewl da dewanê Menecîr, Lelan, Amrî û Ehrezî bigîrî. Şervananê QSDyî bi çalakîyan dewanê Menecîr, Lelan, Amrî û Ehrezî artêşa Tirk û çeteyanê ci ra pak kerd û planê dagîrkeran veng vet. Netîceyê çalakîyan de xeylê dagîrkerî kişîyayî û birîndar bîyî. Çeteyanê artêşa Tirkî seba ke dewa Alya bigîrî hêriş kerd, labelê netîceyê xoverdayîşê şervanan de mecbûr mendî remayî.
Wa Kurdan bipawî
Vera hêrişanê dagîrkerîye de paytextê Fransa Parîsî de bi desan parlamenter, senator, serekê şaredarîye, roşnvîr, nuştox, sînemager, temsîlkarê rêxistinanê sivîlan û sewbîna ameyî têhet û waşt ‘Wa Fransa desinde bikewo têgêrayîşî mîyan û Kurdan bipawo’. YJK-E zî seba Rojawanî veng da û dîyar kerd ke ‘Heta ke Erdogano Faşîst û çeteyê ci erdanê ma cehimênî û şonî ma do ziqaqan de bibî’.
Kurdî do heta peynî xover bidî
Endamê Konseyê Caardişî yê KCKyî Sabrî Okî vera hêrişan de va ‘heme dinya hetê ma de ya’ û wina dewam kerd: “Kurdî do heta peynî xover bidî. Netîce se beno wa bibo, Kurdî û rûmetê merdimîye do qezenç bikerî. Xora Erdogan seba ke îqtîdar ra keweno, hêriş keno. Erdogan nêşêno bi nê probleman îqtîdarê xo bidomno. Xora hetê sîyasî de xeniqîyabi. Çîyo ke komelê Tirkîya ra vajo, nêmendbi. Tena argumanê terorî bikar ardêne. Labelê do bedelê nêyî giran bo. Kurdî qebul nêkenî, emrê Erdoganî bi aşman sînordar o.”
Erdogan faşîstê na seserre yo
Okî dewamê qiseykerdişê xo de va ‘kesê ke vera DAÎŞî de şerê rûmetî dayêne, ewro bi tanq, top û teyarayan yenî bombekerdene’ û wina domna: “Ganî nika herkes biweriştênê payan ser. Heme dinya vera Hîtlerî de têkoşîn da û ancax şêna zorê ci bîşêro. Erdogan faşîstê na seserre yo. Çeteyî mîyanê nê şerî de ca gênî, labelê îdeolojîyêkê înan çin o. Wayîrê nê îdeolojîyî Erdogan o. Îdeolojîyo raşt yê Erdoganî, îdeolojîyê DAÎŞî yo.”
AMED